کشتواڑ میں سالانہ مچل ماتا یاترا ۲۵جولائی سے شروع ہونے کا امکان

جموں//
جموں وکشمیر کے ضلع کشتواڑ میں سالانہ شری مچل ماتا یاترا امسال۲۵جولائی سے شروع ہونے کا امکان ہے ۔
ذرائع نے بتایا کہ ابھی تک سرکاری طور پر حتمی اعلان ہونا باقی ہے تاہم عارضی طور پر مچل یاترا۲۵؍جولائی سے شروع ہونے کا امکان ہے ۔
ذرائع نے کہا کہ اگر۲۵جولائی سے شری مچل ماتا یاترا یاترا شروع ہوجاتی ہے تو یہ۵ستمبر کو اختتام پذیر ہوگی۔
ان کا کہنا تھا کہ یاترا کے متعلق تمام تر انتظامات کا جائزہ لیا جا رہا ہے اور یاتریوں کی سہولیت کے لئے سہولیات کو مزید بہتر بنایا جا رہا ہے ۔
ذرائع کے مطابق سال گذشتہ جموں وکشمیر کے علاوہ ملک کے مختلف حصوں سے تعلق رکھنے والے یاتریوں کی بھاری تعداد نے اس یاترا میں حصہ لیا تھا۔
سال گذشتہ یہ یاترا کورونا وبا کے باعث دو برسوں کے بعد بحال ہوئی تھی۔
اس یاترا کے بخوبی و بلا کسی خلل کے انعقاد کو یقینی بنانے کیلئے ہر سال وسیع پیمانے پر سیکورٹی بندوبست کیا جاتا ہے اور یاتریوں کیلئے دیگر سہولیات کو بھی بہم رکھا جاتا ہے ۔