سوئیہ بگ واقعہ :فارنسک ٹیم کا جائے واردات کا معائنہ ‘ ثبوتوں کو جمع کیا

سرینگر///
ڈائریکٹوریٹ آف فارنسک سائنسز‘جموں و کشمیر، کی ایک ٹیم نے وسطی کشمیر کے بڈگام ضلع کا دورہ کیا اور واردات کی جگہ کا معائنہ کرنے کے علاوہ ثبوتوں کو جمع کیا۔
فارنسک ٹیم میں ڈپٹی ڈائریکٹر، ایف ایس ایل، سرینگر، ایک ڈی این اے ماہر، ایک سائبر ماہر اور فنگر پرنٹ کے ماہر بھی شامل تھے۔
بڈگام ضلع میں ہوئے ایک خاتون کے قتل کے معاملہ کی باریک بینی سے چھان بین کی غرض سے بڈگام پولیس کے ہمراہ فارنسک ٹیم نے علاقے کا دورہ کیا اور جاے وقوعہ سے مختلف نمونے جمع کیے۔
ذرائع کے مطابق فارنسیک ٹیم نے موقع سے مقتولہ کے بالوں کے نمونے بر آمد کیے ہیں جبکہ اس کے علاوہ دو مقامات پر موجود خون کے دھبوں کا بھی نمونہ جمع کیا گیا۔
ماہرین کی جانب سے جمع کیے گئے نمونے پولیس ٹیم کے سپرد کیے گئے جنہیں تحویل کے سلسلے کے بعد فارنسک معائنے کیلئے پیش کرنے کی ہدایت کی گئی۔ فارنسک عمل کو محفوظ رکھنے کیلئے پوری جانچ کے دوران عکس بندی بھی کی گئی۔
یاد رہے کہ چند روز قبل ضلع بڈگام میں قتل کا ایک دلخراش واقعہ پیش آیا جس میں ایک خاتون کے جسم کے کئی ٹکڑے برآمد ہوئے۔ ابتدائی تفتیش کے دوران معلوم ہوا کہ خاتون کا قتل کرنے کے بعد لاش کو ٹھکانے لگانے کے لیے اسکے جسم کے ٹکڑے کیے گئے۔ اس واقعہ کی خبر منظر عام پر آتے ہی علاقے میں غم و غصہ کی لہر دوڑ گئی جبکہ احتجاج کا سلسلہ بھی شروع ہوا۔
پولیس نے اس ضمن میں فوری کارروائی عمل میں لاتے ہوئے معاملہ درج کرکے ایک ملزم کو حراست میں لے لیا۔
سماجی، سیاسی اور مذہبی تنظیموں نے اس واقعے کی سخت الفاظ میں مذمت کی اور قاتل کو سخت سزا دیے جانے کا بھی مطالبہ کیا۔ انتظامیہ کی جانب سے اس حوالہ سے مزید چھان بین کے لیے فارنسک ٹیم کو بھی طلب کیا گیا۔
اس دوران ڈسٹرکٹ لیگل سروسز اتھارٹی (ڈی ایل ایس اے) بڈگام نے ہفتہ کے روز پولیس کو ہدایت دی کہ وہ ان افراد کے خلاف ایف آئی آر درج کرے جنہوں نے ہلاک ہونے والی خاتون کی ویڈیو اور تصاویر اپ لوڈ کی ہیں۔
ڈسٹرکٹ لیگل سروس اتھارٹی (ڈی ایل ایس اے)، ڈسٹرکٹ کورٹ کمپلیکس بڈگام نے ایک حکم میں سینئر سپرنٹنڈنٹ آف پولیس (ایس ایس پی) بڈگام کو ان افراد کے خلاف ایف آئی آر درج کرنے کی ہدایت دی، جنہوں نے متاثرہ کی تصاویر اور ویڈیوز کو اپ لوڈ اور گردش کیا ہے۔
’’یہ دیکھا گیا ہے کہ میڈیا اور عام لوگ سوئیہ بگ بڈگام قتل کی گئی خاتون کی ویڈیوز کو گردش کر رہی ہیں۔ مزید یہ کہ مقتولہ کی تصاویر اور اس کے پوسٹ مارٹم کی ویڈیوز بھی متعدد افراد نے اپ لوڈ اور گردش کی ہیں، جس سے مقتولہ اور اس کے اہل خانہ کی رازداری کے حق کی خلاف ورزی ہوئی ہے۔ مذکورہ بالا افراد اور ایجنسیوں کے ایسے اقدامات خلاف قانون ہیں جس میں مقتولہ کی شناخت ظاہر کی گئی ہے اور یہاں تک کہ اس کی نجی ویڈیوز بھی اپ لوڈ اور گردش کی گئی ہیں جن میں مقتولہ کے پوسٹ مارٹم کی ویڈیو بھی شامل ہے، جو کہ قانون کے تحت قابل سزا ہے‘‘۔
اس میں مزید کہا گیا کہ اس طرح، میڈیا اور عام لوگوں کو اس کے ذریعے مطلع کیا جاتا ہے کہ وہ متاثرہ کی شناخت ظاہر کرنا اور اس کی تصاویر کو فوری طور پر گردش کرنا بند کریں، ایسا نہ کرنے پر، خلاف ورزی کرنے والوں کے خلاف قانون کے تحت مقدمہ درج کیا جائے گا۔
اس لیے ایس ایس پی بڈگام کو ہدایت دی گئی ہے کہ وہ ان افراد کے خلاف ایف آئی آر درج کریں جنہوں نے متاثرہ کی تصویریں اور ویڈیوز اپ لوڈ اور سرکولیشن کیے ہیں۔
مزیدایل ڈی اسپیشل موبائل مجسٹریٹ بڈگام سے درخواست کی گئی ہے کہ وہ متعلقہ سوشل میڈیا ایجنسیوں کو ہدایت دیں کہ وہ تمام سوشل میڈیا پلیٹ فارمز سے مقتولہ کی تصاویر اور ویڈیوز کو ہٹا دیں اور ایسے خلاف ورزی کرنے والوں کے اکاؤنٹس کو بھی بلاک کریں۔