جائیداد ٹیکس کو کچھ برسوں کے لئے موقوف کیا جانا چاہئے : الطاف بخاری

سرینگر/۶مارچ
جموںکشمیر اپنی پارٹی کے صدر‘ سید الطاف بخاری نے زور دیا ہے کہ جموںکشمیر میں پراپرٹی ٹیکس کچھ برسوں کےلئے موقوف کیا جانا چاہئے ۔
بخاری نے کہا کہ جموں وکشمیر میں لوگ ابھی اس حالت میں نہیں ہیں کہ وہ یہ ٹیکس ادا کر سکیں۔
ان باتوں کا اظہار اپنی پارٹی کے صدر نے سرینگر میں نامہ نگاروں سے بات چیت کے دوران کیا۔
بخاری نے کہاکہ پراپرٹی ٹیکس کو کچھ برسوں کےلئے موقوف کیا جانا چاہئے کیونکہ جموںکشمیر کے لوگ ابھی ٹیکس دینے کی حالت میں نہیں ہیں۔
اپنی پارٹی کے صدر کے مطابق لیفٹیننٹ گورنر کا یہ کہنا درست ہوسکتا ہے کہ دوسری ریاستوں کے لوگ بھی جائیداد ٹیکس ادا کر رہے ہیں ، لیکن یہ بھی حقیقت ہے کہ جموں کشمیر کے لوگ ابھی تک پراپرٹی ٹیکس ادا کرنے کی پوزیشن میں نہیں ہیں۔
بخاری نے کہاکہ ہم جموں کشمیر کے لوگوں کی طرف سے آپ (ایل جی) سے صرف درخواست کر رہے ہیں کہ پراپرٹی ٹیکس کو کچھ برسوں کے لئے موخر کیا جائے ۔
رائل سپرنگ گالف کورس اور دیگر سرکاری املاک کو پرائیوٹائز کرنے کے بارے میں پوچھے گئے سوال کے جواب میں بخاری نے کہاکہ جموںکشمیر میں اچھے مقامی کھلاڑی موجود ہیں اوروہ اس حوالے سے مشورہ دے سکتے ہیں ۔
اُن کے مطابق مقامی کھلاڑیوں کو اس حوالے سے اعتماد میں لے کر اُنہیں بھی بولی میں شامل کیا جانا چاہئے تاکہ اُن کے لئے بھی روزگار کی سبیل ہو سکے ۔انہوں نے کہاکہ سرکار کو یہ بھی دیکھنا چاہئے کہ وہ ان جائیدادوں کے لئے کتنی بولی لگائے گی تاکہ مقامی کھلاڑی بھی ان شرائط اور بولی پر کھرا اُتر سکے ۔