سرینگر لہیہ شاہراہ کو مارچ کے آخر تک کھولنے کا امکان :بی آر او

سرینگر//
۴۳۴ کلومیٹر طویل سرینگر لیہہ شاہراہ پر برف ہٹانے کا کام شروع کر دیا گیا ہے ۔بارڈر روڈز آرگنائزیشن (بی آر او) کا کہنا ہے کہ موسم سازگار رہنے کی صورت میں مارچ کے آخر تک شاہراہ پر برف ہٹانے کا کام مکمل کر لیا جائے گا۔
بی آر او نے بتایا کہ خراب موسم کی وجہ سے سرینگر لیہہ شاہراہ کو ۶جنوری کو ٹریفک کے لیے بند کر دیا گیا تھا، تاہم موسم میں بہتری کے ساتھ ہی شاہراہ پر برف صاف کرنے کا عمل شروع کر دیا گیا ہے اور انہیں امید ہے کہ مارچ کے آخر تک اسے ٹریفک کے لئے بحال کر دیا جائے گا۔
سرینگر لیہہ شاہراہ نہ صرف دو یونین ٹیریٹریز جموں و کشمیر اور لداخ کے باشندوں کے لئے انتہائی اہمیت کی حامل ہے بلکہ حفاظتی اہلکاروں کے لیے بھی یہ شاہراہ شہہ رگ کے مانند ہے۔
جموں و کشمیر کو لداخ کو زمینی راستے سے جوڑنے والی یہ واحد شاہراہ ہے جو سرما میں بھاری برفباری کے دوران ٹریفک کی آمد و رفت کے لیے بند رہتی ہے۔
بی آر او کے عہدیداروں اور شاہراہ پر کام کرنے والے افراد نے بتایا کہ سرینگر لیہہ شاہراہ پر سے برف صاف کرنے کے عمل میں جدید ترین مشینری بشمول سنو کٹرز کو کام پر لگا دیا گیا ہے۔
ایک عہدیدار نے کہا کہ شاہراہ پر کیپٹن موڑ، شیطانی نالہ، مندر موڑ، بجری نالہ سمیت زوجیلا پاس اور دیگر متعدد مقامات پر، تقریبا ہر سال، برفانی تودے گرنے سے کئی مقامات پر۴۰ سے ۵۰ فٹ تک برف جمع ہے اور اسے صاف کرنے میں بی آر او کو سخت چیلنجز کا سامنا رہتا ہے۔
عہدیدار نے مزید کہا کہ رواں برس شدید برفباری کی وجہ سے امکان ہے کہ سرینگر لداخ شاہراہ کو ٹریفک کی آمد و رفت کیلئے بحال کرنے میں گزشتہ برس کے مقابلے میں زیادہ وقت لگ سکتا ہے۔
شاہراہ پر کام کر رہے ایک عہدیدار نے بتایا کہ برف صاف کرنے کے دوران انہیں کئی طرح کے چلینجز کا سامنا کرنا پڑتا ہے تاہم تجربہ کار انجینئروں کی نگرانی میں مزدور اور جدید ترین ٹیکنالوجی سے لیس مشینیں کام پر لگی ہوئی ہیں اور موسم خشک رہنے کی صورت میں رمضان المبارک سے قبل ہی شاہراہ کو ٹریفک کی آمد و رفت کے قابل بنایا جائے گا تاکہ خطہ لداخ کے باشندوں کو ماہ مبارک کے دوران سبزی، پھلوں سمیت دیگر اشیاء ضروریہ کی قلت کا سامنا نہ کرنا پڑے۔