بارہمولہ میں چوری کا کیس حل

سرینگر//
پولیس نے شمالی کشمیر کے ضلع بارہمولہ میں چوری کے ایک کیس کو۷۲گھنٹوں کے اندر حل کرکے چار افراد کو گرفتار کرکے مسروقہ مال کو بر آمد کرنے کا دعویٰ کیا ہے ۔
ایک پولیس ترجمان نے اپنے ایک بیان میں کہا کہ پولیس اسٹیشن پٹن کو ۵فروری کو غلام حسن راتھر ساکن پکی پورہ پٹن کی طرف سے ایک شکایت موصول ہوئی جس میں کہا گیا کہ یکم اور۲فروری کی درمیانی شب نامعلوم چوروں نے اس کے دکان میں گھس کر سگریٹ چرائے ۔
ترجمان نے کہا کہ تحقیقات کے دوران تکنیکی و انسانی وسائل کی مدد سے چند مشکوک افراد کے نام سامنے آگئے جن میں سے آزاد مختار حجام ساکن سنگھ پورہ پٹن کو پوچھ تاچھ کیلئے طلب کیا گیا۔
بیان میں کہا گیا کہ پوچھ تاچھ کے دوران مذکورہ شخص نے اپنے اور تین دیگر افراد کے اس چوری میں ملوث ہونے کا انکشاف کیا۔
دیگر تین افراد کی شناخت الطاف احمد ڈار ساکن ریشی پورہ ہانجی ویرہ، اعجاز احمد بٹ اور جمشید احمد وازہ ساکنان سنگھ پورہ پٹن کے بطور ہوئی ہے ۔بیان کے مطابق چاروں ملزموں کو گرفتار کیا گیا۔
پولیس بیان میں کہا گیا کہ ان کے انکشاف پر چوری کیلئے استعمال کئے جانے والے سامان اور مسروقہ مال کو بر آمد کیا گیا۔