سپریم کورٹ سماعت کے لیے خصوصی بینچ تشکیل دے گی

نئی دہلی// سپریم کورٹ نے منگل کو بلقیس بانو کیس کی سماعت کے لیے رضامندی ظاہر کرتے ہوئے کہا کہ وہ جلد ہی اس کے لیے ایک خصوصی بنچ تشکیل دے گی۔
چیف جسٹس ڈی وائی جسٹس چدر چوڑ کی سربراہی والی بنچ نے بلقیس کی وکیل شوبھا گپتا کی عرضی پر سماعت کرنے پر اتفاق کیا۔ خصوصی تذکرے کے دوران وکیل نے اس معاملے کی جلد سماعت کی درخواست کی تھی۔
بلقیس بانو نے عدالت عظمیٰ میں ایک رٹ پٹیشن دائر کی تھی جس میں گینگ ریپ کے 11 مجرموں کی بریت یا قبل از وقت رہائی کو چیلنج کیا گیا تھا۔
15 اگست کو گجرات حکومت نے عمر قید کی سزا پانے والے 11 مجرموں کو رہا کیا تھا۔ حکومت نے 2008 میں عمر قید کی سزا پانے والے تمام 11 مجرموں کو سزا کے وقت گجرات میں رائج معافی کی پالیسی کے مطابق رہا کر دیا تھا۔
2002 کے گجرات فسادات کے دوران بلقیس بانو کے ساتھ مبینہ طور پر اجتماعی عصمت دری کی گئی تھی اور اسے اس کے خاندان کے 14 افراد کے ساتھ مرنے کے لیے چھوڑ دیا گیا تھا، جن میں اس کی تین سالہ بیٹی بھی شامل تھی۔ بلقیس بانو پانچ ماہ کی حاملہ تھیں جب وڈودرا میں فسادیوں نے ان کے خاندان پر حملہ کیا۔
سپریم کورٹ نے 13 دسمبر کو بلقیس کی نظرثانی کی درخواست کو خارج کر دیا تھا۔
سپریم کورٹ نے درخواست کو خارج کرتے ہوئے کہا تھا کہ ‘ہماری رائے میں 13 مئی 2022 کے فیصلے میں کوئی خامی نظر نہیں آتی، جس کی وجہ سے نظرثانی کی جا سکے ۔’