جھیل ولر میں۸۴برسوں کے بعد بطخ کی ایک نایاب نسل دیکھی گئی

سرینگر//
شمالی کشمیر کے ضلع بانڈی پورہ میں واقع ایشیا کی سب سے بڑے جھیل ولر میں۸۴برسوں کے طویل عرصے کے بعد لمبی دُم والی بطخ کی ایک نایاب نسل کو دیکھا گیا۔
بطخ کی اس نایاب نسل کو ولر کنزرویشن اینڈ مینجمنٹ اتھارٹی (ڈبیلو یو سی ایم اے ) کے فیلڈ اہلکاروں نے۲۲جنوری کو اس جھیل میں دیکھا۔
بطخوں کی یہ نسل یورپی اور امریکی بر اعظموں میں پائی جاتی ہے اور اس کو آئی یو سی این ریڈ لسٹ میں ناپید ہونے کے انتہائی خطرے سے دوچار قرار دیا گیا ہے ۔
کنزرویٹر عرفان رسول نے یو این آئی اردوکو بتایاکہ جھیل ولر میں گزشتہ ماہ۸۴برسوں کے بعد بطخ کی ایک نایاب نسل دیکھی گئی۔انہوں نے کہاکہ نایاب نسل کی بطخ دنیا کے سرد ترین مقام خاص کر سربیا میں نظر آتی ہے لیکن اس بار وادی کشمیر میں بھی اس کو دیکھا گیا ۔
رسول کے مطابق مذکورہ بطخ ناروے میں پائی جاتی ہے اور وہ سردی کے دنوں میں مخصوص مقامات کی اور سفر کرتی ہے۔انہوں نے مزید بتایا کہ سال ۲۰۱۳میں اس قسم کی بطخ کو اروناچل پردیش اور جموں میں بھی دیکھا گیا۔
کنزرویٹر نے بتایا کہ سال۱۹۳۹کے بعد پہلی دفعہ نایاب قسم کی بطخ جھیل ولر میں دیکھی گئی جو خوش آئند بات ہے ۔جھیل ولر میں مہمان پرندوں کو تحفظ فراہم کرنے کے حوالے سے متعلقہ محکمہ کی جانب سے اُٹھائے جارہے اقدامات کے بارے میں پوچھے گئے سوال کے جواب میں عرفان رسول نے کہاکہ موجودہ سرکار نے مہمان پرندوں کو تحفظ فراہم کرنے کی خاطر زمینی سطح پر کارگر اقدامات اُٹھائے ہیں۔
رسول نے مزید بتایا کہ جس جگہ سے بھی شکایت ملتی ہے تو فوری طورپر کارروائی عمل میں لا کر شکاریو ں کو دھر دبوچ کر سلاخوں کے پیچھے دھکیل کر اُن کے خلاف باضابط طورپر کیس درج کیا جاتا ہے ۔انہوں نے کہا کہ امسال جموں وکشمیر انتظامیہ کی ہدایت پر متعلقہ محکمہ مہما ن پرندوں کو تحفظ فراہم کرنے کی خاطر جھیل ولر کی صفائی کا کام شروع کیا جو کئی مہینوں تک جاری رہا۔
کنزرویٹر کے مطابق آبی پناہگاہوں کی ڈرجنگ اور صفائی کے باعث ہی نایاب قسم کے مہمان پرندے اب واردکشمیر ہو رہے ہیں۔
رسول نے بتایا کہ شکاری مہمان پرندوں کا شکار کرنے کی خاطر خاص قسم کی تین بندوقیں استعمال کرتے ہیں۔انہوں نے بتایا کہ حکام نے گزشتہ دنوں ہی ایک پنٹ گن جو کہ مہمان پرندوں کو مارنے کی خاطر استعمال میں لایا جاتا ہے کو برآمد کرکے ضبط کیا۔
اُن کے مطابق ابھی تک دو ایف آئی آر بھی درج کئے گئے جبکہ جھیل ولر کے اردگرد علاقوں میں مشتبہ مکانوں کی تلاشی بھی لی گئی ۔اُن کے مطابق گزشتہ سالوں کے مقابلے امسال مہمان پرندوں کا شکار کرنے کے واقعات میں غیر معمولی کمی واقع ہوئی کیونکہ انتظامیہ نے اب اس کیلئے سخت قوانین بنائے ہیں۔
رسول کا مزید کہنا تھا کہ مہمان پرندوں کو تحفظ فراہم کرنے کی خاطر زمینی سطح پر اقدامات اُٹھائے جارہے ہیں جبکہ خاطی شکاریوں کے خلاف باضابط طورپر ایف آئی آر بھی درج کئے جاتے ہیں۔