’افواج میں تمام ذاتوں اور مذاہب کے نوجوانوں کیلئے مواقع‘

لکھنؤ//
نیشنل ڈیفنس اکیڈمی میں منتخب ہونے پر یوپی کی لڑکی ثانیہ مرزا کی ستائش کرتے ہوئے وزیر دفاع راج ناتھ سنگھ نے جمعہ کو کہا کہ ہندوستانی مسلح افواج میں تمام ذاتوں اور مذاہب کے نوجوانوں کیلئے مواقع ہیں۔
یہاں ایک یونیورسٹی کے کانووکیشن کی تقریب سے خطاب کرتے ہوئے سنگھ نے کہا ’’ہندوستانی مسلح افواج میں تمام ذاتوں اور مذاہب کے نوجوانوں کیلئے مواقع ہیں۔ ایک مسلمان لڑکی ثانیہ مرزا کورس کی کامیاب تکمیل کے بعد ہندوستان کی پہلی خاتون مسلم فائٹر پائلٹ بن جائیں گی‘‘۔
وزیر دفاع نے مزید کہا کہ ایک وقت تھا جب دفاعی افواج میں خواتین کی نمائندگی مشکل سے ہوتی تھی لیکن آج خواتین جنگی جہازوں اور سیاچن جیسے انتہائی علاقوں میں تعینات ہیں۔
مرزا پور کے ایک ٹی وی مکینک کی بیٹی ثانیہ مرزا نے نیشنل ڈیفنس اکیڈمی (این ڈی اے) کے داخلہ امتحان میں کامیابی حاصل کی ہے۔
ثانیہ مرزا، مرزا پور دیہات کوتوالی پولیس اسٹیشن کے تحت جسوور گاؤں سے تعلق رکھتی ہیں، ملک کی پہلی خاتون فائٹر پائلٹ اونی چترویدی کی طرح فائٹر پائلٹ بننے کی خواہشمند ہیں۔
ہندی میڈیم اسکول میں تعلیم حاصل کرنے والی ثانیہ نے کہا کہ ہندی میڈیم کے طلبہ بھی اگر عزم کریں تو کامیابی حاصل کرسکتے ہیں۔ ۲۷ دسمبر کو، وہ پونے میں این ڈی اے کھڑکواسلا میں شامل ہوئیں۔
ثانیہ کی دسویں جماعت تک کی تعلیم ان کے گاؤں میں ہی مکمل ہوئی۔ اس نے پنڈت چنتامنی دوبے انٹر کالج میں پرائمری سے کلاس ۱۰ تک تعلیم حاصل کی۔ اس کے بعد وہ شہر کے گرو نانک گرلز انٹر کالج چلی گئیں۔ وہ ۱۲ویں اتر پردیش (یو پی) بورڈ میں ضلعی ٹاپر تھیں اور این ڈی اے کیلئے اپنی تیاری شروع کر دی تھیں۔