ڈی ٹی سی کے سبکدوش ملازمین اور مارشل فاقہ کشی کے دہانے پر: کانگریس

نئی دہلی//کانگریس نے دہلی ٹرانسپورٹ کارپوریشن (ڈی ٹی سی) کے ریٹائرڈ ملازمین کو گزشتہ دو تین مہینے سے پنشن کی عدم ادائیگی اور ڈی ٹی سی کی بسوں میں مارشل کے طور پر کام کرنے والے نوجوانوں کو تنخواہوں کی عدم ادائیگی پر تشویش ظاہر کرتے ہوئے کہا ہے کہ یہ سب لوگ فاقہ کشی کے دہانے پر ہیں لیکن وزیر اعلی اروند کیجریوال اب بھی چین کی نیند سو رہے ہیں۔
ان لوگوں کی قابل رحم حالت کو دیکھتے ہوئے دہلی پردیش کانگریس کے سینئر ترجمان ڈاکٹر نریش کمار نے منگل کے روز لیفٹیننٹ گورنر ونے کمار سکسینہ کو خط لکھ کر اس معاملے میں فوری مداخلت کرنے کی اپیل کی ہے ۔
ڈاکٹر نریش کمار نے کہا کہ ان لوگوں کو پنشن اور تنخواہ کی عدم ادائیگی کی وجہ سے اپنا گھر چلانے کے بحران کا سامنا ہے ۔ خط میں انہوں نے مسٹر سکسینہ کی توجہ مبذول کرائی کہ ڈی ٹی سی کے ریٹائرڈ ملازمین کو گزشتہ 2-3 ماہ سے پنشن نہیں دی گئی ہے ۔
اور ڈی ٹی سی مارشل کی تنخواہیں گزشتہ دو ماہ سے ادا نہیں کی گئی ہیں۔ یہ سب غریب لوگ ہیں اور مہینے کے شروع میں تنخواہ/پنشن لینا چاہتے ہیں۔
انہوں نے لیفٹیننٹ گورنر سے اس معاملے میں مداخلت کرنے کی درخواست کرتے ہوئے کہا کہ مسٹر کیجریوال کہتے تھے کہ ایک بار جب ڈی ٹی سی دہلی حکومت کے کنٹرول میں آجائے تو ریٹائرڈ ملازمین اور تمام قسم کے لوگوں کی خدمت کی تمام ادائیگیاں وقت پر کی جائیں گی، لیکن ان کے لمبے چوڑے دعوے سب جھوٹے ثابت ہو رہے ہیں۔ ان میں سے زیادہ تر لوگ دیہی علاقوں سے ہیں اور یہ اس وقت ہو رہا ہے جب دہلی کے وزیر ٹرانسپورٹ خود دیہی ماحول سے تعلق رکھتے ہیں۔