روپے ڈیبٹ کارڈ اور بھیم -یو پی آئی سے لین دین کے فروغ کیلئے 2600 کروڑ روپے کا منصوبہ منظور

نئی دہلی// وزیر اعظم نریندر مودی کی صدارت میں مرکزی کابینہ نے اپریل 2022 سے ایک سال کی مدت کے لیے روپے ڈیبٹ کارڈ کو فروغ دینے اور کم قیمت والے بھیم -یو پی آئی فرد کی جانب سے کاروباریوں کو ادائیگیوں کے لیے مراعات کو منظوری دے دی ہے ۔
پوائنٹ آف سیل (پی او ایس) اور ای کامرس لین دین کو فروغ دینے کے لیے اس اسکیم پر 2600 کروڑ روپے خرچ کیے جائیں گے ۔ ایسی سکیم لانے کا اعلان وزیر خزانہ نے بجٹ تقریر میں کیا تھا۔
مسٹر مودی کی صدارت میں کابینہ کی میٹنگ کے بعد ماحولیات، جنگلات اور آب و ہوا کی تبدیلی اور محنت اور روزگار کے وزیر بھوپیندر یادو نے بدھ کونامہ نگاروں کو یہ اطلاع دی۔
کابینہ میں منظور کی گئی تجویز کے مطابق، موجودہ مالی سال 2022-23 میں روپے ڈیبٹ کارڈ اور کم قیمت والے بھیم-یو پی آئی لین دین (پرسن ٹو مرچنٹ) کے فروغ کے لیے منظور شدہ ترغیبی اسکیم کے لیے 2,600 کروڑ روپے کے اخراجات کو منظوری دی گئی ہے ۔
اسکیم کے تحت، مرچنٹ بینکوں کو موجودہ مالی سال مالی سال 2022-23 کے لیے روپے ڈیبٹ کارڈز اور کم قیمت والے بھیم-یو پی آئی لین دین (پی 2 ایم) کا استعمال کرتے ہوئے پوائنٹ آف سیل (پی او یس ) اور ای کامرس لین دین کو فروغ دینے کے لیے مالی حوصلہ افزائی کی جائے گی۔
محترمہ سیتا رمن نے مالی سال 2022-23 کے لیے اپنی بجٹ تقریر میں حکومت کی جانب سے پچھلے بجٹ میں اعلان کی گئیں ڈیجیٹل ادائیگیوں کے لیے مالی معاونت جاری رکھنے کے ارادے کا اعلان کیا جس میں سستی اور صارف دوست ادائیگی کے پلیٹ فارم کے استعمال کو فروغ دینے پر توجہ مرکوز کی گئی ہے ۔ یہ اسکیم اس بجٹ کے اعلان کی تعمیل کے لیے لائی گئی ہے ۔
سال 2021-22 میں حکومت نے ڈیجیٹل لین دین کو مزید فروغ دینے کے لیے ایک پروموشنل اسکیم کو منظوری دی تھی۔ اس کے نتیجے میں، کل ڈیجیٹل ادائیگی کے لین دین میں سال بہ سال 59 فیصد اضافہ ہوا۔ مالی سال 2020-21 میں اس طرح کی ادائیگی 5,554 کروڑ روپے تھی، جو مالی سال 2021-22 میں بڑھ کر 8,840 کروڑ روپے ہوگئی ہے ۔ اس مدت کے دوران بھیم-یو پی آئی لین دین 106 فیصد سال در سال اضافے کے ساتھ 2,233 کروڑ روپے سے بڑھ کر 2021-22 میں 4,597 کروڑ روپے ہوگیا تھا۔
واضح رہے کہ ڈیجیٹل ادائیگی کے نظام کے مختلف متعلقین اور ریزرو بینک آف انڈیا (آر بی آئی) نے ڈیجیٹل ادائیگیوں کی ایکو سسٹم کی ترقی پر صفر ایم ڈی آر اصو ل کے ممکنہ منفی اثرات کے بارے میں تشویش کا اظہار کیا۔
نیشنل پیمنٹ کارپوریشن آف انڈیا (این پی سی آئی) نے بھیم-یو پی آئی اور روپے ڈیبٹ کارڈ کے لین دین کو ترغیب دینے کے لئے ایکوسٹم متعلقین کے لیے لاگت سے موثر قیمت کی تجویز بنانے ، مرچنٹ آن بورڈنگ کی حوصلہ افزائی کرنے اور نقد ادائیگیوں سے تیزی سے ڈیجیٹل ادائیگیوں کو فعال کرنے کے لیے دیگر باتوں کے علاوہ اس طرح کی کوئی ترغیبی اسکیم شروع کرنے کی اپیل کی تھی۔