ٹیسٹ کرکٹ میں کوئی جیت آسان نہیں ہوتی: راہل

چٹگاوں//
ہندوستانی کپتان لوکیش راہل نے بنگلہ دیش کے خلاف پہلے ٹیسٹ میں جیت کے بعد اتوار کو کہا کہ ٹیسٹ کرکٹ میں کوئی بھی جیت آسان نہیں ہوتی اور وہ اپنی ٹیم کی توانائی سے بے حد خوش ہیں۔
راہل کی قیادت میں ہندوستان نے اتوارکے روز بنگلہ دیش کو پہلے ٹیسٹ کے پانچوں دن 188 رنوں سے شکست دی۔ ہندوستان نے تیسرے دن کے اختتام سے قبل ہی 258/2 پر اپنی اننگ ڈکلیئر کر دی تھی لیکن بنگلہ دیش کو آؤٹ کرنے میں اسے تقریباً چار سیشن لگے۔
راہل نے میچ کے بعد صحافیوں سے کہا، ‘یہ ٹیسٹ کرکٹ ہے۔ آپ کو کوئی جیت آسانی سے نہیں ملے گی۔ اتنا ٹیسٹ کرکٹ کھیلنے کے بعد ہم یہ سمجھ چکے ہیں کہ کئی مواقع پر مخالف ٹیم بھی اچھا کھیلے گی۔ ہمیں اس کا احترام کرتے ہوئےاپنا کام کرتے رہنا چاہیے۔ مجھے اس جیت پر فخر ہے۔
اگرچہ یہ رنز کے لحاظ سے ایک بہت بڑی فتح تھی لیکن ہندوستان کو بنگلہ دیش کا پہلا وکٹ حاصل کرنے کے لیے 46 اوورز تک انتظار کرنا پڑا۔ اس سے قبل بنگلہ دیش نے پہلی اننگ میں بھی ہندوستان کے چار وکٹ جلدی گرادئے تھے، جس کے بعد چیتشور پجارا اور شریاس ائیر نے بالترتیب 91 اور 86 رنز کی اننگز کھیل کر ٹیم کو مشکلات سے نکالا۔
راہل نے کہا، “ہماری توانائی پورے ٹیسٹ میچ میں بہت اچھی رہی اور ہم نے اسے دن بھر برقرار رکھا۔ گزشتہ پانچ دنوں میں ہم نے ٹیم کے تئیں بہترین ذمہ داری دکھائی ہے۔ ہم نے طویل عرصے سے ٹیسٹ کرکٹ نہیں کھیلا ہے، اس لیے ہمیں اس میچ سے پہلے کچھ خدشات تھے۔ ہم نے اچھا کیا جو بہت خوش آئند ہے۔