علی گڑھ یونیورسٹی میں زیر تعلیم کشمیری طالبعلم دو روز سے لاپتہ

علیگڑھ//
علیگڑھ مسلم یونیورسٹی (اے ایم یو) کے سٹی ہائی اسکول میں دسویں جماعت میں زیر تعلیم کشمیر سے تعلق رکھنے والا طالب علم مسرور عباس میر ولد‘ محمد عباس میر گزشتہ روز سے لاپتہ ہے۔
مسرور عباس میر جموں و کشمیر میں ضلع بارہمولہ کے قصبہ سوپور کے بوہاری پورہ گاؤں کا ہے۔
اس معاملے میں علیگڑھ مسلم یونیورسٹی کے پراکٹر دفتر میں مسرور عباس میر کی گمشدگی کی رپورٹ درج کرانے اور ضروری قانونی کارروائی کے لئے تحریر دی گئی ہے۔
تحریر کے مطابق گزشتہ روز یعنی ۸ دسمبر کو مسرور عباس میر روزانہ کی طرح صبح ۸ بجے ندیم ترین ہال سے سٹی ہائی اسکول کیلئے روانہ ہوا، وہ اپنے ساتھ اپنے بھائی کا اے ٹی ایم کارڈ اور موبائل نمبر۶۰۰۵۵۷۶۸۸۵ لے گیا تھا لیکن وہ اسکول سے واپس نہیں آیا۔ کافی تلاش کے بعد بھی کوئی سراغ نہیں ملا اور نہ ہی وہ اپنے کمرے میں واپس آیا جبکہ اس کا موبائل بھی بند آرہا ہے۔
اسکول پرنسپل سید تنویر نبی نے بتایا کہ مسرور عباس میر گزشتہ روز اور آج اسکول نہیں آیا اس کی اطلاع یونیورسٹی پراکٹر کو دے دی گئی ہے۔
گمشدگی کی تحریر کے مطابق موبائل نمبر۸۴۹۱۸۷۸۸۱۲ پر پیغام ملا کہ اس نے علیگڑھ رام گھاٹ روڈ اے ٹی ایم مشین پر اے ٹی ایم کارڈ سے۵۰۰۰ روپے نکالے گئے ہیں۔