بی جے پی حکومت غریبوں،کسانوں پر مظالم ڈھارہی:اکھلیش

رامپور//سماج وادی پارٹی(ایس پی)سربراہ اکھلیش یادو نے جمعرات کو حکمراں جماعت بی جے پی پر غریبوں و کسانوں پر مظالم روا رکھنے کا الزام لگاتے ہوئے کہا کہ جھوٹے مقدمات درج کر کے اعظم خان کے خلاف سخت ناانصافی کی گئی ہے ۔
رامپور صدر اسمبلی سیٹ پر ہونے والے ضمنی الیکشن میں ایس پی امیدوار عاصم راجا کی حمایت میں منعقد ایک ریلی سے خطاب کرتے ہوئے اکھلیش نے کہا’ایس پی کے لوگ قانون اور آئین کی پاسداری کرتے ہیں اور آئین کے مطابق اپنے حق کی لڑائی لڑرہے ہیں۔ اس وقت جو لوگ اقتدار میں ہیں انہیں قانون و آئین کوخاطر میں نہیں لاتے ۔ وہ نہ تو قانون پر عمل کررہے ہیں اور نہ ہی آئین پر۔
انہوں نے عوام سے اپیل کی کہ انہیں جو بھی رسک لینا پڑے وہ لیں اور بی جے پی کو اپنی ووٹ کی طاقت کے ذریعہ اقتدار سے اکھاڑ پھینکیں۔انہوں نے کہا کہ وہ لوگ جنہیں پنجایت الیکشن میں عوام نے سبق سکھایا تھا انہوں نے دھوکہ دھڑی کے ذریعہ سیٹ حاصل کرلی۔
عوام سے ایس پی کی جیت کو یقینی بنانے کی اپیل کرتے ہوئے اکھلیش نے کہا کہ سال 2024 میں تبدیلی آئے گی اور اس کے بعد بی جے پی حکومت اترپردیش میں نہیں بچ سکے گی۔رامپور کے ضمن الیکشن صرف ایک سیٹ کا الیکشن نہیں ہے ۔ یہ الیکشن بی جے پی حکومت کی چولیں ہلانے کا ہے ۔
انہوں نے انتباہی انداز میں کہا کہ جو لوگ آج اقتدار میں اور عوام کے ساتھ ناانصافیاں کررہے ہیں۔ انہیں ہمیں اس بات پر مجبور نہیں کرنا چاہئے کہ جب ہم اقتدار میں واپس لوٹیں تو وہی کام کریں جوآج یہ کررہے ہیں۔
اکھلیش نے کہا کہ جب میں ریاست کا وزیر اعلی تھا تو موجود وزیر اعلی کی فائل میرے سامنے آئی تھی لیکن میں نے واپس کردیا۔ہم سماجی لوگ اس طرح کی سیاست نہیں کرتے جس طرح کی یہ لوگ کررہے ہیں۔بی جے پی حکومت ہر سطح پر ناانصافیاں اورمظالم ڈھا رہی ہے ۔لکھیم پوری کھیری میں بی جے پی لیڈر اور کارکنوں کی گاڑیوں کے نیچے کسانوں کو کچل دیا گیا۔