۲۰۱۴ کے بعد کا ہندوستان مختلف ہے ‘بالی میںہندوستانی برادری سے مودی کا خطاب

بالی//
وزیر اعظم نریندر مودی نے منگل کو یہاں ہندوستانی برادری سے خطاب کرتے ہوئے کہا کہ ہندوستان آج دنیا کی سب سے تیزی سے ترقی کرنے والی بڑی معیشت ہے اور ملک ایک بڑے مقصد کیلئے کام کر رہا ہے اور تیزی کے ساتھ ایک نئی قوت کے طور پر ابھر رہا ہے ۔
بالی میں جاری جی۲۰گروپ سربراہی اجلاس میں ہندوستانی وفد کی قیادت کرتے ہوئے مودی نے کہا کہ ہندوستان نے اپنی آزادی کے امرت دور میں ایک ترقی یافتہ ملک بننے کا ہدف مقرر کیا ہے اور ہندوستان کے اس مقصد میں پوری دنیا کی بھلائی بھی جڑی ہوئی ہے ۔
۲۰۱۴سے پہلے اوراس کے بعد کے ہندوستان کے درمیان فرق بتلاتے ہوئے مودی نے کہا’’یہ فرق مودی نہیں‘یہ رفتار (کام کرنے کی رفتار) اور اسکیل (کام کا پیمانہ) ہے ‘‘۔انہوں نے کہا کہ ہندوستان اب چھوٹے اہداف کا تعین نہیں کرتا۔ آج کا ہندوستان ایک بے مثال رفتار اور پیمانے پر کام کر رہا ہے ۔
اپنی حکومت کی خصوصی مہم کے دوران کھولے گئے۳۲کروڑ جن دھن کھاتوں کا تذکرہ کرتے ہوئے وزیر اعظم نے کہا کہ یہ امریکہ کی کل آبادی کے برابر ہے اور اسی طرح تین کروڑ مفت گھر دیے گئے ہیں، جو ہر آسٹریلوی شہری کی ضرورت پورا کرنے کے برابر ہے ۔
وزیر اعظم نے کہا’’ اس دوران ہندوستان نے جو بڑی شاہراہ تیار کی ہے وہ زمین کے ڈیڑھ چکر کے برابر ہے ۔ آیوشمان بھارت میں پانچ لاکھ روپے کا مفت علاج کرانے والوں کی تعداد یورپ کی آبادی سے زیادہ ہے ۔ کووڈ ویکسین کی مفت خوراکوں کی تعداد جو ہندوستان نے دی ہے وہ یورپ اور امریکہ کی آبادی کے ڈھائی گنا کے برابر ہے ‘‘۔
مودی نے موجود ہجوم سے پوچھا’’کیا یہ آپ کا سر اونچا نہیں کرتا، آپ کو فخر نہیں کراتا؟‘‘وزیراعظم کے اس سوال کا جواب وہاں موجود لوگوں نے اونچی آواز میں دیا۔ انہوں نے کہا کہ اسی لئے میں کہتا ہوں پہلے ہندوستان۔ وزیر اعظم نے کہا کہ ہندوستان اپنی جڑوں سے جڑ کر ترقی کی نئی بلندیوں کو چھونے کا ارادہ رکھتا ہے ۔
وزیر اعظم نے کہا کہ ہندوستان خلا کے شعبہ میں ایک سپر پاور بن کر ابھر رہا ہے اور جنوبی ایشیا کے ممالک بھی اس سے فائدہ اٹھا رہے ہیں۔انہوں نے کہا کہ ہندوستان دفاعی میدان میں اسلحہ برآمد کرنے کی پوزیشن میں ہے اور ہمارے برہموس میزائل اور تیجس لڑاکا طیارے پوری دنیا میں مانگے جا رہے ہیں۔
وزیر اعظم نے کہا’’ہندوستان آج بڑے اہداف طے کرتا ہے اور انہیں حاصل کرنے کے لیے عزم کے ساتھ کوشش کرتا ہے ۔ سنکلپ سے سدھی کا یہ منتر پوری دنیا کی فلاح کیلئے ہے ۔‘‘