ہندوستان سے کیریبین ممالک کو برآمدات بڑھانے کے بھرپورمواقع

نئی دہلی// حالیہ برسوں میں ہندوستان اور کیریبین ممالک کے درمیان تجارت میں تیزی سے اضافہ ہوا ہے اورریفائنڈ پٹرولیم، الیکٹرانکس، ٹرانسپورٹ، دالیں، نظری آلات کے ساتھ ساتھ جانوروں یا سبزیوں سے حاصل شدہ چربی اور تیل وغیرہ کے ذریعہ ہندوستانی برآمدات میں اضافہ کیا جاسکتا ہے ۔
ہندوستان اور کیریبین ممالک کے درمیان 2001 میں 5.24 کروڑ ڈالر کی تجارت تھی جو 2021 تک بڑھ کر 1.7 ارب ڈالر تک پہنچ گئی۔ ایکسپورٹ-امپورٹ بینک آف انڈیا (انڈیا ایگزم بینک) اور کیریبین ایکسپورٹ ڈیولپمنٹ ایجنسی (سی ای ڈی اے ) کے مشترکہ تحقیقی مطالعہ سے یہ بات سامنے آئی ہے ۔
انڈیا-کیریفورم تعاون کے لیے باہمی اقتصادی تعلقات اورامکانات میں اضافہ کے عنوان سے جاری اس رپورٹ میں ہندوستان اور کیریبین خطے کے لیے تجارت، سرمایہ کاری اور باہمی تعاون کے شعبوں میں موجود مختلف مواقع پر روشنی ڈالی گئی ہے ۔ کیریبین خطے کے ممالک کے ساتھ ہندوستان کی اقتصادی سرگرمیاں اپنی حقیقی صلاحیت سے کم رہی ہیں۔ ان معیشتوں کے مختلف سائز اور ان کا جغرافیائی فاصلہ اور رابطہ اس کی بنیادی وجوہات ہیں۔ تاہم، یہ قابل ذکر ہے کہ کیریبین خطے میں 2021 میں 33.4 کروڑآبادی اور18.53 ارب ڈالر کی کل جی ڈی پی رہی۔ کیریبین ممالک نے دنیا کے بڑے تجارتی ممالک کے ساتھ کئی تجارتی معاہدے کیے ہیں۔ اس کے پیش نظر ہندوستانی کاروباری دنیا کے لیے کیریبین خطے میں بے پناہ امکانات ہیں، اس کے علاوہ یہ خطہ ہندوستان کے لیے دنیا کے دیگر حصوں کے لیے بھی داخلی دروازہ ثابت ہوسکتا ہے ۔