ٹی ٹوئنٹی ورلڈ کپ کی بہترین ٹیم میں کوہلی اورسوریہ کمار شامل

میلبورن// ٹی 20 ورلڈ کپ 2022 میں ہندوستان کے اہم بلے بازوں وراٹ کوہلی اور سوریہ کمار یادو کو ٹورنامنٹ کی بہترین ٹیم میں شامل کیا گیا ہے۔
انٹرنیشنل کرکٹ کونسل (آئی سی سی) نے اتوار کو "ٹورنامنٹ کی بہترین ٹیم” کا اعلان کیا ہے جس میں انگلینڈ کے چار، پاکستان اور ہندوستان کے دو دو اور جنوبی افریقہ، زمبابوے اور نیوزی لینڈ سے ایک ایک کھلاڑی شامل ہیں۔
ٹیم کے اوپنرز ایلکس ہیلز اور جوس بٹلر ہیں جبکہ ان کے ہم وطن سیم کیرن اور مارک ووڈ ٹیم کے تیز گیند بازوں میں شامل ہیں۔
پاکستان کی جانب سے شاداب خان اور شاہین شاہ آفریدی اس سکواڈ کا حصہ ہیں جب کہ جنوبی افریقہ کے اونریک نورکھیا، زمبابوے کے سکندر رضا اور نیوزی لینڈ کے گلین فلپس الیون کو مکمل کر رہے ہیں۔
کوہلی اس ٹی 20 ورلڈ کپ کے چھ میچوں میں چار نصف سنچریوں کے ساتھ سب سے زیادہ رنز بنانے والے کھلاڑی تھے۔ ہندوستانی ٹیم ٹورنامنٹ میں سیمی فائنل سے آگے نہیں بڑھ سکی لیکن کوہلی نے 98.66 کی بے مثال اوسط سے مجموعی طور پر 296 رنز بنائے۔ انہوں نے ٹورنامنٹ کے ہندوستان کے پہلے میچ میں پاکستان کے خلاف ناٹ آؤٹ 82 رنز کی عمدہ اننگز کھیلی، جسے انہوں نے اپنے ٹی ٹوئنٹی کیریئر کی بہترین اننگز قرار دیا۔
کوہلی کے ساتھ بلے باز سوریہ کمار یادو کو ان کی جارحانہ بلے بازی کے لیے بہترین الیون میں شامل کیا گیا۔ انہوں نے ٹورنامنٹ کے دوران چھ میچوں میں 189.68 کے جارحانہ اسٹرائیک ریٹ سے مجموعی طور پر 239 رنز بنائے۔
ٹورنامنٹ میں شاندار کارکردگی کا مظاہرہ کرنے والے ہندوستان کے اسٹار آل راؤنڈر ہاردک پانڈیا کو ٹیم کے 12ویں کھلاڑی کے طور پر شامل کیا گیا ہے۔
پانڈیا نے چھ میچوں میں آٹھ وکٹیں حاصل کیں اور ترتیب میں نیچے آنے کے باوجود، ہندوستان کے لیے سب سے زیادہ رنز بنانے والوں کی فہرست میں کوہلی اور سوریہ کمار کے بعدتیسرے نمبر پر رہے۔