نئی دہلی//ہندوستان نے ایران کے شہر شیراز میں واقع شاہ چراغ درگاہ پر دہشت گردانہ حملے کی سخت مذمت کی ہے اور دہشت گردی کی لعنت کو ختم کرنے کے لیے دنیا کو متحد ہو کر لڑنے کی ضرورت کا اعادہ کیا ہے ۔
آج یہاں ایک بیان میں وزارت خارجہ نے کہا کہ ہندوستان شیراز میں شاہ چراغ پر دہشت گردانہ حملے کی شدید مذمت کرتا ہے ۔ ہم ایرانی عوام اور جاں بحق ہونے والوں کے اہل خانہ کے تئیں دلی تعزیت کا اظہار کرتے ہیں۔
بیان میں کہا گیا ہے کہ یہ گھناؤنا جرم ہمیں ایک بار پھر یاد دلاتا ہے کہ دہشت گردی بین الاقوامی امن و سلامتی کے لیے سب سے بڑا اور مہلک خطرہ ہے اور یہ وقت کا تقاضا ہے کہ دنیا کے تمام ممالک متحد ہو کر دہشت گردی کا کسی بھی شکل میں مقابلہ کریں۔
شاہ چراغ پر حملے میں نقاب پوش مسلح افراد نے لوگوں پر فائرنگ کی جس کے نتیجے میں کم از کم 15 افراد ہلاک اور 40 سے زائد زخمی ہوگئے ۔ داعش نے حملے کی ذمہ داری قبول کر لی ہے ۔ ایرانی صدر ابراہیم رئیسی نے جوابی کارروائی کی وارننگ دی ہے ۔