’عدم ترقی کشمیر میں دہشت گردی کی ایک وجہ تھی‘

لداخ//
وزیر دفاع‘ راج ناتھ سنگھ نے کہا ہے کہ بنیادی ڈھانچے میں ترقی کا فقدان جموں کشمیر میں دہشت گردی کی ایک اہم وجہ رہا ہے ۔
وزیر دفاع نے اس بات کا اظہار آج لداخ میں منعقدہ ایک تقریب میں بارڈر روڈز آرگنائزیشن (بی آر او) کے ذریعہ تعمیر کردہ۷۵ بنیادی ڈھانچے کے منصوبوں کو قوم کے نام وقف کرنے کی ایک تقریب کے دوران کیا ۔
وزیر دفاع نے سرحدی علاقوں کے ساتھ رابطے کو ملک کی مجموعی ترقی کیلئے حکومت کی توجہ کا مرکز قرار دیا۔انھوں نے کہا، ’’آزادی کے بعد کئی دہائیوں سے جموں و کشمیر میں بنیادی ڈھانچے کی ترقی کا فقدان مرکز کے زیر انتظام علاقے میں دہشت گردی کے عروج کی ایک وجہ تھی۔ ان داخلی گڑبڑوں کے نتیجے میں سیاحوں کی آمد و رفت میں نمایاں کمی واقع ہوئی جس نے لداخ کے ساتھ ساتھ پورے ملک کو بھی متاثر کیا‘‘۔
وزیر دفاع کاکہنا تھا’’اب حکومت کی کوششوں کی وجہ سے یہ خطہ امن اور ترقی کی ایک نئی صبح کا مشاہدہ کر رہا ہے۔ ہمارا مقصد ملک کی تمام ریاستوں / مرکز کے زیر انتظام علاقوں کی ترقی کو جاری رکھنا ہے۔ جلد ہی تمام دور دراز علاقوں کو ملک کے باقی حصوں سے جوڑا جائے گا اور ہم مل کر قوم کو ترقی کی نئی بلندیوں پر لے جائیں گے۔ اس مقصد کو حاصل کرنے میں بی آر او کا اہم رول ہے‘‘۔
راج ناتھ سنگھ نے ملک کی سلامتی کی ضروریات کو پورا کرنے کیلئے دور دراز کے علاقوں کی ترقی کو یقینی بنانے کے لیے حکومت کے عزم کا اعادہ کیا اور اس بات پر زور دیا کہ مسلح افواج کی بہادری کے ساتھ ساتھ بنیادی ڈھانچے کی ترقی ہی وہ بنیادی وجہ ہے جس نے بھارت کو شمالی سیکٹر کی حالیہ صورتحال سے مؤثر طریقے سے نمٹنے میں مدد فراہم کی۔
سنگھ نے نئے ۷۵ منصوبوں کو اس عزم کا ثبوت قرار دیا اور کہا کہ یہ پل، سڑکیں اور ہیلی پیڈ ملک کے مغربی، شمالی اور شمال مشرقی حصوں کے دور دراز علاقوں میں فوجی اور سول ٹرانسپورٹ کی سہولت فراہم کریں گے، جو ترقیاتی سلسلے کا ایک حصہ بنیں گے۔
یہ۷۵پروجیکٹ ۴۵ پل‘۲۷ سڑکیں‘ دو ہیلی پیڈ اور ایک کاربن نیوٹرل ہیبی ٹیٹ۔ چھ ریاستوں اور دو مرکز کے زیر انتظام علاقوں (یو ٹی) میں پھیلے ہوئے ہیں۔ ان میں سے۲۰ پروجیکٹ جموں و کشمیر (جے اینڈ کے) میں ہیں جبکہ لداخ اور اروناچل پردیش میں۱۸‘۱۸ پروجیکٹ ؛ اتراکھنڈ میں پانچ اور دیگر سرحدی ریاستوں سکم، ہماچل پردیش، پنجاب اور راجستھان میں ۱۴پراجیکٹ۔
سنگھ نے کہا کہ اسٹریٹجک نقطہ نظر سے اہم ان پروجیکٹوں کی تعمیر بی آر او نے ریکارڈ وقت میں۲۱۸۰ کروڑ روپے کی کل لاگت سے کی ہے، جن میں سے کئی کو جدید ترین ٹکنالوجی کا استعمال کرتے ہوئے ایک ہی کام کے موسم میں مکمل کیا گیا ہے۔
مشکل موسمی حالات کے باوجود یہ کارنامہ انجام دینے کے لیے بی آر او کے عزم اور ہمت کی ستائش کرتے ہوئے وزیر دفاع نے اجاگر کیا کہ یہ منصوبے ملک کی دفاعی تیاریوں کو تقویت دیں گے اور سرحدی علاقوں کی معاشی ترقی کو یقینی بنائیں گے۔
اپنے اہلکاروں کے لیے۱۹ہزار فٹ کی اونچائی پر بی آر او کے پہلے کاربن نیوٹرل ہیبی ٹیٹ کا بھی ہینلے میں افتتاح کیا گیا۔ یہ ملک کا پہلا کاربن نیوٹرل یونین ٹریٹری بننے کے لداخ کے عزم میں حصہ ڈالنے کیلئے بی آر او کی کوشش ہے۔
اس کمپلیکس کی اہم خصوصیات میں۵۷ اہلکاروں کی رہائش اور شدید موسم کے دوران تھرمل کمفرٹ شامل ہے۔ یہ بی آر او کو سردیوں کے بڑے حصے کے دوران موثر طریقے سے کام کرنے کے قابل بنائے گا۔