سرینگر//
پولیس نے جموں کشمیر کے بڈگام ضلع سے انسانی اسمگلنگ کرنے والے ایک گروہ کا پردہ فاش کرکے ۱۴ خواتین کو بازیاب کرایا ہے۔
پولیس کاکہنا ہے کہ تین افراد‘ شمیم احمد بھٹ‘ شگفتہ اور عصمت کو گرفتار کیا گیا۔
ایک پولیس اہلکار نے بتایا کہ ضلع میں انسانی اسمگلنگ کے کام کرنے کی اطلاع پر کارروائی کرتے ہوئے پولیس کی ایک ٹیم نے گاؤں دلی پورہ میں چھاپہ مارا اور۱۴ لڑکیوں‘جن میں کچھ نابالغ بھی ہیں‘ کو بھٹ کے گھر اور ملحقہ جگہوں سے باز یاب کیا۔
اہلکار نے کہا کہ ابتدائی تفتیش کے دوران یہ بات سامنے آئی ہے کہ ملزمان خواتین کو وادی کے دوسرے حصوں سے بڈگام پہنچاتے تھے۔انہوں نے کہا کہ اس معاملے میں مزید گرفتاریوں کی توقع ہے، اہلکار نے بتایا کہ بڈگام پولیس اسٹیشن میں مقدمہ درج کیا گیا ہے۔
پولیس اہلکار نے مزید کہا کہ باز یاب کی گئیں لڑکیوں کو چاڈورہ کے ناری نکیتن بحالی مرکز میں منتقل کر دیا گیا ہے اور ان کی باز آباد کاری کا عمل شروع کر دیا گیا ہے۔