ناگپور// مہاراشٹر کے وزیر اعلی ایکناتھ شنڈے نے منگل کو دعویٰ کیا کہ ان کی حکومت نے گزشتہ تین مہینوں میں عوام کے مفاد میں 72 بڑے فیصلے کئے ہیں۔
مسٹر شنڈے نے یہاں ڈاکٹر امبیڈکر بین الاقوامی ہوائی اڈے پر نامہ نگاروں سے کہا کہ ان کی حکومت نے پچھلے تین مہینوں میں عوام کے مفاد میں 72 بڑے فیصلے کئے ہیں اور کہا کہ وہ اپنے کام سے اپوزیشن کی تنقید کا جواب دیں گے ۔
انہوں نے کہا کہ ہم نے عوام کے مفاد میں 72 بڑے فیصلے کئے ہیں۔ اپوزیشن کو ہم پر تنقید کرنے دیں، ہم انہیں اپنے کام سے جواب دیں گے ۔
ریاست میں زیادہ بارشوں سے متاثر کسانوں کو معاوضہ کی ادائیگی کی صورتحال کے بارے میں پوچھے جانے پر مسٹر شنڈے نے کہا کہ ان کی حکومت پوری طرح کسانوں کے ساتھ ہے اور عہدیداروں کو ہدایت دی گئی ہے کہ وہ جلد سے جلد فصلوں کے نقصان کا جائزہ لیں۔
بعد میں وزیر اعلیٰ مہاراشٹر کے نکسل سے متاثر علاقے گڈوچرولی ضلع کے دور افتادہ بھمرا گڑھ علاقے میں پولیس کے ساتھ دیوالی منانے کے لیے روانہ ہوئے ۔
قبل ازیں ایئرپورٹ پر میڈیا سے بات چیت کرتے ہوئے وزیراعلیٰ نے کہا کہ دیوالی جیسے تہوار کے دوران بھی اپنے گھروں سے دور رہنا اور پولیس فورس کے ساتھ اپنے فرائض کی انجام دہی کے ساتھ دیوالی منانا اطمینان کی بات ہے ۔
مسٹر شنڈے نے کہا کہ گڈچرولی ضلع کی ترقی ان کا پہلا مقصد ہے اور یہ خوشی کی بات ہے کہ ضلع میں نکسل ازم آہستہ آہستہ ختم ہو رہا ہے ۔