انگلینڈ کا مڈل آرڈر پاکستان پر بھاری

برسبین// مڈل آرڈر کی مضبوط بلے بازی کی بدولت انگلینڈ نے ٹی 20 ورلڈ کپ 2022 کے بارش سے متاثرہ وارم اپ میچ میں پیر کو پاکستان کو چھ وکٹوں سے شکست دے دی۔
پاکستان نے انگلینڈ کو 19 اوور میں 161 رن کا ہدف دیا جسے انگلینڈ نے 26 گیندیں باقی رہتے حاصل کر لیا۔
اوپنر بلے باز فل سالٹ اور ایلکس ہیلز کے بالترتیب ایک اور نو رن پر آؤٹ ہونے کے بعد بین اسٹوکس اور لیام لیونگسٹن نے تابڑ توڑ بیٹنگ کی۔ اسٹوکس نے 18 گیندوں پر دو چوکوں اور تین چھکوں کی مدد سے 36 جبکہ لیونگسٹن نے 16 گیندوں پر ایک چوکے اور دو چھکوں کی مدد سے 28 رن کی اننگز کھیلی۔
ان دونوں بلے بازوں کے بعد ہیری بروک اور سیم کرن نے دھماکہ خیز اننگز کھیل کر انگلینڈ کو ہدف تک پہنچا دیا۔ بروک نے 24 گیندوں پر دو چوکوں اور چار چھکوں کی مدد سے ناٹ آؤٹ 45 رن بنائے جبکہ سیم کرن نے 14 گیندوں پر دو چوکوں اور تین چھکوں کی مدد سے 33 رن بنائے۔
لیونگسٹن کے آؤٹ ہونے کے وقت انگلینڈ کاا سکور 10.3 اووروں میں 104 رن تھا لیکن بروک کرن نے 26 گیندوں میں 59 رن کی دھماکہ خیز شراکت قائم کر کے14.4 اوور میں ہی ٹیم کو ہدف تک پہنچا دیا۔
اس سے قبل ٹاس ہارنے کے بعد بیٹنگ کرتے ہوئے پاکستان نے 19 اوور میں آٹھ وکٹوں کے نقصان پر 160 رن بنائے۔ شان مسعود نے 22 گیندوں پر سات چوکوں سمیت 39 رن بنا کر ٹیم کو اچھا آغاز فراہم کیا لیکن مڈل آرڈر اس کا فائدہ نہ اٹھا سکا۔ افتخار احمد نے 22 (18)، شاداب خان نے 14 (14) جبکہ آصف علی نے 14 (12) رن بنائے۔ آخر میں محمد وسیم جونیئر نے 16 گیندوں میں تین چوکوں اور ایک چھکے کی مدد سے 26 رن بنا کر پاکستان کو باعزت اسکور تک پہنچا دیا۔
انگلینڈ کی جانب سے ڈیوڈ ولی نے دو جبکہ لیونگسٹن، کرس جارڈن، کرن اور اسٹوکس نے ایک ایک وکٹ حاصل کیا۔