دہلی حکومت نے مزدوروں کی کم از کم اُجرت میں اضافہ کیا ہے

نئی دہلی// دہلی کے نائب وزیر اعلیٰ منیش سسودیا نے جمعہ کو دہلی کے غیر تربیت یافہ، ، نیم تربیت یافتہ اور دیگرمزدوروں کے مہنگائی بھتے میں اضافہ کرنے کا حکم جاری کیا۔ جس کی وجہ سے ان کی کم از کم اجرت میں اضافہ ہوگا۔
مسٹر سیسودیا نے بدھ کو کہا کہ غریبوں اور مزدور طبقے کے مفادات کو ذہن میں رکھتے ہوئے یہ بڑا قدم بڑھتی مہنگائی کے درمیان اٹھایا گیا ہے ۔ کلریکل اور سپروائزر طبقے کے ملازمین کو بھی اس کا فائدہ ملے گا۔ انہوں نے کہا کہ غیر منظم شعبے کے ایسے کارکنوں کے مہنگائی الاؤنس کو نہیں روکا جا سکتا، جنہیں عام طور پر صرف کم از کم اجرت ملتی ہے ۔ اس لیے دہلی حکومت نے مہنگائی الاؤنس کو جوڑ کر نئی کم از کم اجرت کا اعلان کیا ہے ۔
انہوں نے کہا کہ مہنگائی بھتے کے تحت غیر ہنر تربیت یافتہ مزدوروں کی ماہانہ تنخواہ 16506 روپے سے بڑھا کر 16792 روپے ، نیم تربیت یافتہ مزدوروں کی ماہانہ تنخواہ 18187 روپے سے بڑھا کر 18499 روپے اور تربیت یافتہ مزدوروں کی ماہانہ تنخواہ 20019 سے 20357 روپے تک کر دی گئی ہے ۔ اس کے علاوہ سپروائزر اور کلریکل ملازمین کی کم از کم اجرت کی شرح میں اضافہ کیا گیا ہے ۔ ان میں نان میٹرک ملازمین کی ماہانہ تنخواہ 18187 روپے سے بڑھا کر 18499 روپے ، میٹرک لیکن نان گریجویٹ ملازمین کی 20019 سے 20357 روپے اور گریجویٹ اور اس سے اوپر کی تعلیمی قابلیت کے حامل ملازمین کی ماہانہ تنخواہ 21756 روپے سے بڑھا کر 22146 روپے کر دی گئی ہے ۔ نئی تنخواہ کا اطلاق یکم اکتوبر سے ہوگا۔