مرلی دھرن امریکہ کے چار روزہ دورے پر

نئی دہلی// خارجی امور کے وزیر مملکت وی مرلی دھرن جمعرات سے امریکہ کے چار روزہ دورے پر جا رہے ہیں۔
اپنے دورے کے پہلے دو روز وہ نیویارک میں ہوں گے جہاں وہ اقوام متحدہ کی سلامتی کونسل کے اعلیٰ سطحی اجلاس میں شرکت کریں گے ۔ وزارت خارجہ نے ایک بیان جاری کرتے ہوئے کہا کہ اجلاس میں "افریقہ میں امن اور سلامتی: قدرتی وسائل کی غیر قانونی اسمگلنگ کے ذریعے مسلح گروپوں اور دہشت گردوں کی مالی معاونت کے خلاف مہم” موضوع پر بات چیت کی جائے گی۔ اجلاس کی صدارت گیبون کے وزیر خارجہ کریں گے ۔
جمعہ کو مسٹر مرلی دھرن ہندوستان-اقوام متحدہ ترقیاتی شراکت دار فنڈ کے قیام کی پانچویں سالگرہ کے موقع پر ایک تقریب میں شرکت کریں گے ۔ یہ فنڈ ترقی پذیر ممالک میں پائیدار ترقیاتی منصوبوں کے لیے آن ڈیمانڈ پر امداد فراہم کرتا ہے ۔ اس میں کم ترقی یافتہ ممالک اور چھوٹے جزیرے والے ممالک پر توجہ دی جاتی ہے ۔ مسٹر مرلی دھرن کی اقوام متحدہ کے سینئر عہدیداروں اور رکن ممالک کے وزراء سے بھی ملاقات متوقع ہے ۔
ہفتہ اور اتوار کو وہ اٹلانٹا میں ہندوستانی کمیونٹی کی طرف سے منعقد ہونے والے پروگراموں میں شرکت کریں گے ۔