جنوبی کشمیر میں کرکٹ کھیلنے کے دوران کھلاڑی حرکت قلب بند ہونے سے فوت

سرینگر///
جنوبی کشمیر کے جبلی پورہ کرکٹ گراؤنڈ میں اُس وقت کہرام مچ گیا جب کھلاڑی حرکت قلب بند ہونے سے برسر موقع ہی از جان ہوا۔
یو این آئی اردو کے نامہ نگار نے بتایا کہ جنوبی ضلع اننت ناگ کے جبلی پورہ کرکٹ گراؤنڈ میں معمول کے مطابق میچ چل رہا تھا تو اسی اثنا میں فیلڈنگ کے دوران ایک کھلاڑی بے ہوش ہو کر زمین پر گر پڑا۔
میدان میں موجود دوسرے کھلاڑیوں نے فوری طورپر ساتھی کھلاڑی کو ہسپتال پہنچایا تاہم وہاں پر موجود ڈاکٹروں نے اسے مردہ قرار دیا۔
متوفی کی شناخت امتیاز احمد خان ساکن نائنہ سنگم کے بطور ہوئی۔
گراؤنڈ میں موجود شاہدین نے بتایا کہ امتیاز نے دو آور کئے اور پھر اُس کو باؤنڈری پر فیلڈنگ کرنے کی ذمہ داری سونپی گئی ۔انہوں نے بتایا کہ امتیاز اچانک زمین پر گر پڑا اور سبھی کھلاڑیوں نے اُس کو ہسپتال پہنچایا تاہم وہ جانبر نہ ہو سکا۔
ابتدائی تحقیقات کے دوران معلوم ہوا ہے کہ نوجوان حرکت قلب بند ہونے سے از جان ہوا۔
مقامی لوگوں کے مطابق متوفی پندرہ روز قبل ہی والد بنا تھا اور اُس کی اہلیہ ابھی بھی ہسپتال میں زیر علاج ہے ۔
دریں اثنا جوں ہی نوجوان کی لاش اُس کے آبائی گاؤں پہنچائی گئی تو وہاں کہرام مچ گیا، خواتین سینہ کوبی کرنے لگی۔