سلو اوور ریٹ کے لئے ہندوستان اور پاکستان پر جرمانہ عائد

دبئی// ایشیا کپ 2022 میں اتوار کو کھیلے گئے گروپ اے کے میچ میں سلو اوور ریٹ کی وجہ سے ہندوستان اور پاکستان کی کرکٹ ٹیموں پر جرمانہ عائد کیا گیا ہے۔
روہت شرما اور بابر اعظم کی ٹیم کی جانب سے مقررہ وقت سے دو دو اوور کم کرنے کے بعد آئی سی سی کے میچ ریفری جیف کرو نے دونوں ٹیموں پر میچ فیس کا 40 فیصد جرمانہ عائد کرنے کا فیصلہ کیا۔
دونوں کپتانوں نےاپنا قصور مانتے ہوئے جرمانہ تسلیم کرلیا ہے جس کے بعد باقاعدہ سماعت کی ضرورت نہیں ہے۔
رپورٹ میں بتایا گیا کہ انٹرنیشنل کرکٹ کونسل (آئی سی سی) کے کھلاڑیوں اور سپورٹ اسٹاف کے کوڈ آف کنڈٹ کے آآرٹیکل 2.22 کے مطابق یہ فیصلہ کیا، جس کے مطابق اگر کوئی ٹیم مقررہ وقت میں ایک اوور کم کراتی ہے تو کھلاڑیوں پر میچ فیس کا 20 فیصد جرمانہ عائد کیا جاتا ہے۔
آن فیلڈ امپائر مسعود الرحمٰن اور روچرا پلیاگرج، ٹی وی امپائر ویمالاسری اور چوتھے امپائر گازی سوہیل نے یہ الزام لگایا۔
خیال رہے کہ ایشیا کپ 2022 کے اہم میچ میں ہندوستان نے دلچسپ مقابلے میں پاکستان کو 5 وکٹوں سے شکست دے دی تھی۔