سرینگر/31اگست
جموںکشمیر کانگریس میں سابق ممبران اسمبلی اور سینئر لیڈران کی جانب سے مستعفی ہونے کا نہ تھمنے والا سلسلہ جاری ہے ۔
بدھ کے روز سابق ممبر اسمبلی اور سینئر لیڈر پیرزادہ محمد سعید نے بھی پارٹی کی بنیادی رکنیت سے مستعفی ہونے کا اعلان کیا۔انہوں نے کہاکہ وہ آزاد گروپ میں شامل ہونے جارہے ہیں۔
باوثوق ذرائع نے یو این آئی اردو کو بتایا کہ جموں وکشمیر کانگریس یونٹ سے وابستہ مزید کئی سینئر لیڈران آنے والے دنوں کے دوران مستعفی ہو رہے ہیں۔ذرائع کے مطابق مذکورہ لیڈران نے گزشتہ دنوں ہی غلام نبی آزاد کے ساتھ نئی دہلی میں ملاقات کی۔
ذرائع کا کہنا ہے کہ غلام نبی آزاد کی جموں آمد کا اب سب کو بے صبری کے ساتھ انتظار ہے کیونکہ جموں میں ریلی کے دوران مین اسٹریم پارٹیوں کے کئی لیڈران کی شمولیت کا امکان ہے ۔
بتادیں کہ پیرزادہ محمد سعید حلقہ انتخاب کوکر ناگ میں دومرتبہ جیت حاصل کرکے کابینہ وزیر بھی رہ چکے ہیں۔
رقعت آمیز مناظر کے بیچ کشتواڑ میں 8 افراد کی بیک وقت نماز جنازہ ادا
جموں/ 31اگست
کشتواڑ حادثے میں جاں بحق ہوئے 8 افراد کی بیک وقت نماز جنازہ ادا کی گئی جس دوران رقعت آمیز مناظر دیکھنے کو ملے ۔
معلوم ہوا ہے کہ آہوں اور سسکیوں کے بیچ مہلوکین کو سپرد خاک کیا گیا ۔
یو این آئی اردو کے نامہ نگار نے بتایا کہ بدھ کے روز کشتواڑ کے دور اُفتادہ گاوں میں آٹھ افراد کی بیک وقت نماز جنازہ ادا کی گئی۔انہوں نے کہاکہ کشتواڑ میں پیر کے روز ٹاٹا سومو گہری کھائی میں جاگری جس وجہ سے اُس میں سوار آٹھ افراد از جان ہوئے ۔
اُن کے مطابق مہلوکین ایک ہی گاوں کے رہنے والے تھے اور جوں ہی اُن کی لاشیں وہاں پہنچائی گئیں تو قیامت صغریٰ بپا ہوئی اور پورا گاوں ماتم کدے میں تبدیل ہوا۔
نامہ نگار نے بتایا کہ ہزاروں لوگوں کی موجودگی میں آٹھ افراد کی بیک وقت نماز جنازہ ادا کی گئی جس کے بعد انہوں نے پُر نم آنکھوں کے ساتھ سپرد خاک کیا گیا۔انہوں نے بتایا کہ لاشوں کو دیکھ کر مرد و زن زار و قطار رو رہے تھے اور پورا گاوں میں ماتم میں تبدیل ہوکر رہ گیا ۔
مقامی لوگوں نے بتایا کہ آئے روز کشتواڑ میں حادثات پیش آرہے ہیں اور حکام صرف بلند بانگ دعوئے کر رہے ہیں۔انہوں نے بتایا کہ شاہراہوں کی مرمت کی خاطر ہم پچھلے کئی سالوں سے چیخ رہے ہیں، لیکن اعلیٰ عہدوں پر فائز آفیسران کو انسانی جانوں کی بھی کوئی پرواہ نہیں ہے ۔