(ایجنسیاں )
سرینگر؍۱۷ نومبر
جموں کشمیر بورڈ آف اسکول ایجوکیشن (جے کے بوسے) نے سرینگر کے سونہ وار علاقے میں واقع برن ہال اسکول کے دو امتحانی مراکز میں مبینہ طور پر نقل کے غیر منصفانہ ذرائع کے استعمال اور موبائل فون کے ذریعے ویڈیو بنانے کے معاملے کی تحقیقات کے لیے ایک کمیٹی تشکیل دی ہے۔
جے کے بوسے کی جانب سے جاری حکم نامے کے مطابق، تحقیقات کا تعلق ایک امتحانی مراکز سے ہے، جہاں۱۶ نومبر۲۰۲۶ کو ہائر سیکنڈری پارٹ اوّل (گیارہویں جماعت) کے سالانہ/ریگولر امتحان کے دوران جغرافیہ، نفسیات، موسیقی، فلسفہ، تعلیم اور بزنس اسٹڈیز کے پرچوں میں موبائل فون کے مبینہ استعمال کی اطلاع موصول ہوئی تھی۔
چیف ایجوکیشن آفیسر سرینگر کی سربراہی میں تشکیل دی گئی کمیٹی میں گورنمنٹ ہائر سیکنڈری اسکول امیرا کدل سرینگر کے پرنسپل، اسسٹنٹ سیکریٹری امتحانات اوّل (کشمیر ڈویژن) اور اسسٹنٹ سیکریٹری اسٹرانگ روم (کشمیر ڈویژن) شامل ہیں۔
کمیٹی کو ہدایت دی گئی ہے کہ وہ واقعے کی تفصیلی تحقیقات کرے اور ان افراد کی نشاندہی کرے جو اس واقعے کی ویڈیو بنانے اور اسے سوشل میڈیا پلیٹ فارمز پر اپ لوڈ کرنے میں ملوث تھے۔
حکم نامے میں کمیٹی سے یہ بھی کہا گیا ہے کہ وہ اس بات کا تعین کرے کہ امتحانی ضابطوں اور جے کے بوسے کی جانب سے جاری کردہ سرکلر ہدایات کی کھلی خلاف ورزی کے دوران نگرانی کی ذمہ داری کس کے سپرد تھی اور یہ واقعہ کس کی غفلت کے باعث پیش آیا۔
کمیٹی کو اپنی تفصیلی رپورٹ تین روز کے اندر متعلقہ دفتر میں پیش کرنے کی ہدایت دی گئی ہے۔










