صدر جمہوریہ نے ایشین پیرا گیمز میں ریکارڈ کارکردگی پر ہندوستانی پیرا کھلاڑیوں کو مبارکباد دی

نئی دہلی، 24 اکتوبر (یواین آئی) صدر جمہوریہ دروپدی مرمو نے جاپان کے آئچی-ناگویا میں ایشین پیرا گیمز میں ریکارڈ ساز کارکردگی کا مظاہرہ کرنے والے ہندوستانی پیرا کھلاڑیوں کو دلی مبارکباد دی ہے۔
صدرجمہوریہ نے کہا کہ یہ انتہائی خوشی اور فخر کی بات ہے کہ ہندوستانی پیرا ایتھلیٹس نے ایشین پیرا گیمز 2026 میں اب تک کے سب سے زیادہ 114 تمغے جیت کر غیر معمولی کامیابی حاصل کی ہے۔
انہوں نے کہا کہ ٹیم انڈیا کی سخت محنت، ثابت قدمی اور پختہ ارادے سے حاصل ہونے والی یہ شاندار کامیابی ایک ایسی مثال قائم کرتی ہے جو ملک کے نوجوانوں کو مشکلات سے گھبرائے بغیر بڑے خواب دیکھنے، لگن کے ساتھ محنت کرنے اور ہمیشہ مثبت رہنے کی ترغیب دے گی۔
صدر جمہوریہ نے ایک بار پھر پورے ہندوستانی دستے کو دلی مبارکباد پیش کی۔