پی وی سندھو اس سال دوسری بار فائنل میں

پیرس، 24 اکتوبر (یواین آئی) دو بار کی اولمپک تمغہ فاتح پی وی سندھو نے جاپان کی ہِنا آکیچی کو سخت مقابلے میں شکست دے کر فرنچ اوپن 2026 بیڈمنٹن ٹورنامنٹ کے خواتین سنگلز فائنل میں جگہ بنا لی۔ عالمی درجہ بندی میں 11ویں نمبر کی سندھو نے 73 منٹ تک جاری رہنے والے سیمی فائنل میں عالمی نمبر 22 ہِنا آکیچی کو 21-10، 20-22، 21-16 سے شکست دی۔
سندھو اس سال بی ڈبلیو ایف ورلڈ ٹور پر دوسری بار فائنل میں پہنچی ہیں۔ جولائی میں انہوں نے اکانے یاماگوچی کو شکست دے کر جاپان اوپن کا خطاب جیتا تھا اور 19 ماہ سے جاری خطاب کے قحط کو ختم کیا تھا۔
دوسرے گیم میں آکیچی نے 14-10 کی برتری حاصل کرلی، لیکن سندھو نے شاندار واپسی کرتے ہوئے اسکور 20-19 تک پہنچا دیا۔ جاپانی کھلاڑی نے گیم جیت کر مقابلہ تیسرے گیم تک پہنچایا۔ فیصلہ کن گیم میں بھی آکیچی نے 14-14 سے برابری کی، لیکن 16-16 کے بعد سندھو نے مسلسل پانچ پوائنٹس حاصل کرکے میچ اپنے نام کرلیا۔ دونوں کھلاڑیوں کے درمیان یہ پہلی ملاقات تھی۔
اتوار کو سپر 750 ایونٹ کے فائنل میں سندھو کا سامنا موجودہ اولمپک اور عالمی چیمپئن جنوبی کوریا کی این سی یونگ سے ہوگا۔ سندھو اب تک ان کے خلاف کھیلے گئے 10 مقابلوں میں ایک بھی میچ نہیں جیت سکی ہیں۔
پیرس میں اب صرف سندھو ہی واحد ہندوستانی کھلاڑی باقی رہ گئی ہیں۔ اسمتا چلیہا کوارٹر فائنل میں نوزومی اوکوہارا سے ہار کر باہر ہوئیں، جبکہ اس سے قبل انہوں نے عالمی نمبر دو اکانے یاماگوچی کو شکست دے کر سب کو حیران کیا تھا۔ مردوں کے سنگلز میں آیوش شیٹی کے چوٹ کے باعث دستبردار ہونے اور لکشیا سین کے پہلے راؤنڈ سے قبل دستبرداری کے بعد ہندوستانی مہم ختم ہوگئی۔ ساتوک سائراج رنکی ریڈی-چراغ شیٹی اور ٹریسا جولی-گایتری گوپی چند بھی اپنے ابتدائی مقابلے ہار کر باہر ہوگئے۔