آئی ایل ٹی-20 2026 کے افتتاحی میچ میں ڈیزرٹ وائپرز اور ایم آئی ایمریٹس آمنے سامنے

دبئی، 7 اکتوبر (یواین آئی) انٹرنیشنل لیگ ٹی-20 کے پانچویں سیزن کا آغاز 21 نومبر کو موجودہ چیمپئن ڈیزرٹ وائپرز اور گزشتہ سیزن کی رنر اپ اور دوسرے سیزن کی چیمپئن ایم آئی ایمریٹس کے درمیان مقابلے سے ہوگا۔ یہ میچ دبئی انٹرنیشنل اسٹیڈیم میں کھیلا جائے گا۔ سیزن کا دوسرا میچ شارجہ واریئرز اور پہلے سیزن کی چیمپئن گلف جائنٹس کے درمیان 21 نومبر کو دوپہر دو بجے شارجہ کرکٹ اسٹیڈیم میں ہوگا۔ تیسرے سیزن کی چیمپئن دبئی کیپٹلز اپنی مہم کا آغاز اپنے ہوم گراؤنڈ دبئی انٹرنیشنل اسٹیڈیم میں ابوظہبی نائٹ رائیڈرز کے خلاف کرے گی۔ یہ ‘سپر سنڈےکے ڈبل ہیڈر کا دوسرا میچ ہوگا۔ ابوظہبی میں پہلا میچ 26 نومبر کو زاید کرکٹ اسٹیڈیم میں ابوظہبی نائٹ رائیڈرز اور ایم آئی ایمریٹس کے درمیان کھیلا جائے گا۔ لیگ 2 دسمبر کو متحدہ عرب امارات کے قومی دن ‘عید الاتحاد’ کے موقع پر روایتی تقریبات کے ساتھ ڈبل ہیڈر مقابلوں کا انعقاد کرے گی۔ دوپہر میں زاید کرکٹ اسٹیڈیم میں ابوظہبی نائٹ رائیڈرز اور ڈیزرٹ وائپرز جبکہ شام کو دبئی انٹرنیشنل اسٹیڈیم میں دبئی کیپٹلز اور ایم آئی ایمریٹس آمنے سامنے ہوں گے۔
34 میچوں پر مشتمل ڈبل راؤنڈ رابن ٹورنامنٹ میں ہر ٹیم 10 میچ کھیلے گی۔ گروپ مرحلے کے 30 میچوں کے بعد پوائنٹس ٹیبل کی سرفہرست چار ٹیمیں چار میچوں پر مشتمل پلے آف مرحلے میں پہنچیں گی۔ 30 روز تک جاری رہنے والے ٹورنامنٹ میں چھ دن ڈبل ہیڈر مقابلے ہوں گے، جبکہ سیزن 5 کا فائنل 20 دسمبر کو دبئی انٹرنیشنل اسٹیڈیم میں کھیلا جائے گا۔