ہندوستان میں سیریز جیت کر 2 دہائیوں کی خشک سالی ختم کرنا چاہتے ہیں: سیمی

اینٹیگا، 25 ستمبر (یو این آئی) ویسٹ انڈیز کے چیف کوچ ڈیرن سیمی کا ماننا ہے کہ ہندوستان کے خلاف ون ڈے سیریز جیت کر 2 دہائیوں کی خشک سالی ختم کرنے اور ٹیم کو پرکھنے کا موقع ہے۔
سیمی نے کہا، ’’ہندوستان میں سیریز جیتے ہوئے ہمیں 24 برس ہوگئے ہیں۔ اس لیے ایک ٹیم کے طور پر خود کو چیلنج کرنے اور پرکھنے کا یہ شاندار موقع ہے کہ ون ڈے میں ہم کہاں کھڑے ہیں۔ یہ ہمارے کھلاڑیوں کے لیے بھی بہترین موقع ہے کہ وہ ہندوستان کے خلاف اچھی کارکردگی کا مظاہرہ کریں اور سیریز جیتنے کی کوشش کریں، جو ہم نے 24 سال سے نہیں کیا ہے۔‘‘
ویسٹ انڈیز اگلے سال کے آغاز میں ون ڈے عالمی کپ کوالیفائر کھیلے گا، کیونکہ وہ ٹورنامنٹ کے لیے براہ راست کوالیفائی کرنے میں ناکام رہا ہے۔ ایسے میں ترواننت پورم سے شروع ہونے والی 3 میچوں کی یہ سیریز سیمی کی نظر میں ٹیم کی تیاریوں کا اہم حصہ بھی ہے۔
انہوں نے کہا، ’’اگر آپ کو کوئی بڑا آئی سی سی ٹورنامنٹ، خاص طور پر محدود اووروں کے فارمیٹ میں جیتنا ہے تو آپ کو ہندوستان کو ہرانا ہوگا۔ ہم یہاں ان کے گھر میں، ان کے حالات میں ان کے خلاف کھیل رہے ہیں۔ یہاں اچھی کارکردگی کا مظاہرہ کرنا اور جیتنا ہمیں اس بات کا اچھا اندازہ دے گا کہ ایک ٹیم کے طور پر ہم کیا کرسکتے ہیں اور عالمی سطح پر مقابلہ کرنے میں ہم کتنے قابل ہیں۔ ہمارا مقصد ہے کہ ٹیم کو مسلسل بہتر کرنا ہوگا، تاکہ جب ہم کوالیفائر میں جائیں تو جنوبی افریقہ کے لیے اپنا ٹکٹ پکا کرنے کی پوزیشن میں ہوں۔‘‘
کوالیفائی کرنے کے سوال پر انہوں نے کہا، ’’حقیقت یہ ہے کہ ہم کوالیفائی نہیں کرپائے ہیں۔ لیکن اگر ہم پیچھے مڑ کر دیکھیں کہ ہم کہاں تھے اور ون ڈے ٹیم کے طور پر ہم نے کیا حاصل کیا ہے تو ہم نے کافی ترقی کی ہے۔ براہ راست کوالیفائی کرنے سے ہم 6 پوائنٹ سے چوک گئے۔ جہاں سے ہم نے شروعات کی تھی، تب ہم 19 یا 20 پوائنٹ پیچھے تھے اور وہاں سے اتنے پوائنٹ حاصل کرنا، میرے خیال میں ہم نے کافی ترقی کی ہے۔ اب صرف شائی ہوپ ہی اکیلے سنچری نہیں بنا رہے ہیں، بلکہ الگ الگ کھلاڑیوں نے سنچریاں بنائی ہیں۔
سیمی کلائی کے اسپنر وٹیل لاس کے ابھرنے سے بھی خوش ہیں۔ 19 سالہ لاس نے جولائی میں نیوزی لینڈ کے خلاف اپنا ون ڈے ڈیبیو کیا تھا اور 5 میچوں میں 8 وکٹیں حاصل کی تھیں۔