سرینگر؍۲۳ستمبر
جموں و کشمیر پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے پاکستان کے سابق وزیر اعظم عمران خان کی بہنوں کی گرفتاری پر تشویش کا اظہار کرتے ہوئے ان کی فوری رہائی کی امید ظاہر کی ہے۔
محبوبہ مفتی نے سوشل میڈیا پلیٹ فارم ایکس پر جاری ایک بیان میں کہا کہ یہ بات انتہائی افسوسناک ہے کہ جنگ زدہ ایران اور امریکہ کے درمیان امن کے لیے اہم ثالث کا کردار ادا کرنے والا پاکستان اپنے ملک میں اختلاف رائے کو برداشت کرنے میں اس قدر کم تحمل کا مظاہرہ کر رہا ہے۔
انہوں نے کہا کہ عمران خان کی آزادی کے لیے آواز اٹھانے پر ان کی بہنوں کو حراست میں لیا جانا انتہائی تشویشناک ہے۔
پی ڈی پی صدر نے کہا کہ انہیں امید ہے کہ پاکستانی مقتدرہ میں موجود ’’سمجھدار آوازیں‘‘ طاقت کے اس من مانے استعمال کے خلاف آواز اٹھائیں گی اور عمران خان کی بہنوں کو جلد رہا کر دیا جائے گا۔
محبوبہ مفتی نے اپنے بیان میں عمران خان کی بہنوں کی گرفتاری کو ان کے بھائی کی آزادی کے مطالبے سے جوڑا اور پاکستان میں اختلاف رائے کے حوالے سے تشویش کا اظہار کیا۔
