سری نگر؍۲۳ ستمبر
پولیس نے بدھ کے روز جموں و کشمیر کے بارہمولہ ضلع میں دہشت گردی سے متعلق ایک معاملے میں ایک رہائشی جائیداد کو غیر قانونی سرگرمیاں (روک تھام) ایکٹ (یو اے پی اے) کے تحت منسلک کردیا۔
پولیس ترجمان کے مطابق شمالی کشمیر کے اس ضلع میں درج ایک ایف آئی آر کے سلسلے میں غیر قانونی سرگرمیاں (روک تھام) ایکٹ۱۹۶۷ کی دفعہ۲۵ کے تحت مذکورہ جائیداد کو منسلک کیا گیا۔
ترجمان نے بتایا کہ منسلک کی گئی جائیداد شیری کے نمبلن گاؤں میں واقع دو منزلہ رہائشی مکان ہے، جو ملزم اعجاز احمد گنائی کی ملکیت ہے۔
انہوں نے کہا کہ تحقیقات کے دوران ابتدائی طور پر یہ بات سامنے آئی کہ مذکورہ جائیداد دہشت گردوں کو پناہ اور رسد و دیگر سہولیات فراہم کرنے اور دہشت گردانہ سرگرمیوں میں معاونت کے لیے استعمال کی گئی، جس کے باعث یو اے پی اے کی متعلقہ دفعات کا اطلاق ہوتا ہے۔
پولیس ترجمان نے بتایا کہ یہ کارروائی پولیس کے ڈائریکٹر جنرل کی ضروری منظوری حاصل کرنے کے بعد عمل میں لائی گئی۔
مکان پر ایک عوامی نوٹس بھی چسپاں کیا گیا ہے، جس کے تحت جائیداد کی فروخت، منتقلی، لیز، رہن رکھنے یا کسی تیسرے فریق کے حق یا مفاد کے قیام پر پابندی عائد کردی گئی ہے۔
پولیس نے کہا کہ یہ کارروائی بارہمولہ پولیس کی جانب سے دہشت گرد نیٹ ورکس کے رسدی اور معاون ڈھانچے کو ختم کرنے کی مسلسل کوششوں کا حصہ ہے اور دہشت گردانہ سرگرمیوں میں سہولت کاری کے لیے استعمال ہونے والے افراد اور جائیدادوں کے خلاف قانون کے مطابق کارروائی جاری رکھی جائے گی۔
۔۔۔(ویب ڈیسک)
