نئی دہلی؍۲۳ستمبر
یونائیٹڈ فورم آف بینک یونینز (یو ایف بی یو) کی جانب سے ہڑتال کی کال کے پیش نظر صارفین کی سہولت کے لیے تمام بینک، بشمول علاقائی دیہی بینک، اتوار کے روز کھلے رہیں گے۔ وزارتِ خزانہ نے بدھ کے روز ایک بیان میں یہ اطلاع دی۔
یو ایف بی یو، جو بینکنگ شعبے کی۹۰ فیصد افرادی قوت کی نمائندگی کرنے کا دعویٰ کرتا ہے‘۲۸ ستمبر سے تین روزہ ہڑتال پر جانے والا ہے۔ اس کی اہم مانگوں میں بینکوں کے لیے پانچ روزہ ورکنگ ویک نافذ کرنا بھی شامل ہے۔
اگر یہ ہڑتال ہوتی ہے تو اس کا وقت بینکنگ شعبے کی ششماہی اختتامی کارروائی کے ساتھ بھی ٹکرائے گا۔
وزارتِ خزانہ کے بیان کے مطابق، یو ایف بی یو کی جانب سے۲۸ سے۳۰ ستمبر۲۰۲۶ تک تین روزہ ملک گیر بینک ہڑتال کی مجوزہ کال، اور اس سے قبل۲۶؍ اور۲۷ ستمبر کو اختتامِ ہفتہ کی تعطیلات کے پیش نظر، حکومت نے شہریوں کو بینکاری خدمات کی فراہمی یقینی بنانے کے لیے پیشگی اقدامات کیے ہیں۔
بیان میں کہا گیا، ’’عوام کی حقیقی بینکاری ضروریات طویل مدت تک متاثر نہ ہوں، اس بات کو یقینی بنانے کے لیے تمام سرکاری شعبے کے بینک اور علاقائی دیہی بینک اتوار‘۲۷ ستمبر۲۰۲۶ کو معمول کے مطابق کام کریں گے۔‘‘
وزارتِ خزانہ نے کہا کہ ریزرو بینک آف انڈیا نے تمام بینک شاخوں، دفاتر، اے ٹی ایم سے منسلک شاخوں اور کرنسی چیسٹس کو۲۷ستمبر کو مکمل طور پر فعال رکھنے کی منظوری بھی دے دی ہے۔
۔۔۔۔۔۔
(ایجنسیاں )
