بی جے پی تنظیم میں بڑے پیمانے پر تبدیلیاں، 28 ریاستوں اور آٹھ مرکز کے زیر انتظام علاقوں کے انچارج اور شریک انچارج مقرر

نئی دہلی، 23 ستمبر (یو این آئی) بھارتیہ جنتا پارٹی (بی جے پی) نے مختلف ریاستوں میں ہونے والے اسمبلی انتخابات کے پیش نظر بڑے پیمانے پر تنظیمی تبدیلیاں کی ہیں اور اس کے تحت مختلف ریاستوں اور مرکز کے زیر انتظام علاقوں کے لیے پارٹی انچارجوں اور شریک انچارجوں کی تقرری کی ہے۔
بی جے پی نے سب سے اہم ریاست اتر پردیش کی ذمہ داری راجیہ سبھا ممبر اسمبلی اور پارٹی جنرل سکریٹری ونود تاوڑے کو سونپی ہے۔ مسٹر تاوڑے کو اتر پردیش کا پارٹی انچارج بنایا گیا ہے، جبکہ مسٹر جگدیش پٹیل، محترمہ میگھا کلکرنی، ڈاکٹر پردیپ ورما اور مسٹر اننت اوجھا کو شریک انچارج بنایا گیا ہے۔ وہیں، سابق مرکزی وزیر محترمہ اسمرتی ایرانی کو ہریانہ، چھتیس گڑھ، مسٹر رام مادھو کو اتراکھنڈ اور تمل ناڈو نیز مسٹر ترون چُگ کو گجرات کا پارٹی انچارج بنایا گیا ہے۔ بی جے پی جنرل سکریٹری ترون چُگ نے بدھ کے روز ایک ریلیز جاری کر کے بتایا کہ پارٹی صدر نتن نبین نے مختلف ریاستوں اور مرکز کے زیر انتظام علاقوں کے لیے پارٹی انچارجوں اور شریک انچارجوں کو مقرر کیا ہے۔ انہوں نے 28 ریاستوں اور آٹھ مرکز کے زیر انتظام علاقوں کے لیے پارٹی انچارجوں اور شریک انچارجوں کی فہرست جاری کی ہے۔
بی جے پی کی جانب سے جاری کردہ فہرست کے مطابق مسٹر ونئے سہسربدھے کو دہلی اکائی کا انچارج بنایا گیا، جبکہ مسٹر جم یانگ سیرنگ نامگیال اور محترمہ درشنا جردوش کو شریک انچارج مقرر کیا گیا۔ بی جے پی نے مسٹر سنجے بھاٹیا کو راجستھان انچارج مقرر کیا، جبکہ محترمہ کویتا پاٹیدار اور مسٹر کلجیت چہل کو شریک انچارج بنایا ہے۔ مسٹر بیجنٹ جے پنڈا مہاراشٹر کے انچارج بنائے گئے ہیں، جبکہ مسٹر امت مالویہ، مسٹر سدانند تناوڑے اور محترمہ کنول جیت سہراوت کو شریک انچارج کی ذمہ داری سونپی گئی ہے۔
مسٹر نبین نے مسٹر ہریش دوویدی کو بہار کا انچارج بنایا ہے، جبکہ محترمہ سنگیتا یادو اور مسٹر روہن گپتا کو شریک انچارج مقرر کیا گیا ہے۔ مسٹر وپلو کمار دیو کو مدھیہ پردیش کا انچارج مقرر کیا گیا ہے۔ مسٹر ترون چُگ کو گجرات کا انچارج مقرر کیا گیا ہے۔ وہیں مسٹر راج دیپ رائے کو منی پور، محترمہ ڈی پورندیشوری کو اڈیشہ، مسٹر سنیل بنسل کو تلنگانہ اور مغربی بنگال، مسٹر بپلب دیو کو مدھیہ پردیش اور محترمہ بھارتی پوار کو گوا کا بی جے پی انچارج مقرر کیا گیا ہے۔
بی جے پی نے انڈمان اور نکوبار کا انچارج مسٹر جے پرکاش کو بنایا ہے۔ وہیں، اروناچل پردیش کے انچارج ڈاکٹر دیویش کمار بنائے گئے ہیں۔ اسی طرح بی جے پی نے ڈاکٹر اروند بھدوریا کو آندھرا پردیش کا انچارج بنایا ہے، جبکہ شریک انچارج کی ذمہ داری مسٹر ونشی سرینیواسن کو سونپی ہے۔ آسام کے انچارج مسٹر منگل پانڈے بنائے گئے ہیں، جبکہ مسٹر پھانگ نون کونیاک اور مسٹر منوج ٹگا شریک انچارج بنائے گئے ہیں۔ چندی گڑھ کے انچارج مسٹر مہندر پانڈے بنائے گئے ہیں۔ دادرا نگر حویلی اور دمن و دیو کی انچارج محترمہ ورشا بین نریندر بھائی پٹیل بنائی گئی ہیں۔