بچپن کا خواب شرمندۂ تعبیر ہوتے دیکھ کر خوشی ہو رہی ہے: وِپراج نگم

بارہ بنکی، 23 ستمبر (یواین آئی) جاپان کے ناگویا میں ہونے والے ایشین گیمز کے لیے ہندوستانی ٹی-20 کرکٹ ٹیم میں منتخب کیے جانے پر نوجوان آل راؤنڈر وِپراج نگم نے کہا کہ بچپن کا خواب پورا ہوتے دیکھنا ان کے لیے انتہائی خوشی کا لمحہ ہے، جسے الفاظ میں بیان کرنا ممکن نہیں۔
لکھنؤ سے متصل بارہ بنکی کے رہنے والے وِپراج کو زخمی ورون چکرورتی کی جگہ ایشین گیمز کی ہندوستانی ٹیم میں شامل کیا گیا ہے۔ وہ 28 ستمبر سے ناگویا میں شروع ہونے والے مقابلوں میں ہندوستان کی نمائندگی کریں گے۔ وِپراج شریئس ایّر اور تلک ورما کی قیادت والی ٹیم کا حصہ ہوں گے، جس میں جسپریت بمراہ، سنجو سیمسن، ایشان کشن، ابھیشیک شرما، اکشر پٹیل اور ارشدیپ سنگھ بھی شامل ہیں۔
وِپراج نے کہا کہ بچپن سے ہی نیلی جرسی پہن کر ہندوستانی کرکٹ ٹیم کا حصہ بننے کا خواب تھا، جو اب ایشین گیمز میں انتخاب کے ساتھ پورا ہونے جا رہا ہے۔ انہوں نے بتایا کہ ان کے پسندیدہ کرکٹر روہت شرما ہیں اور وہ ان سے کئی بار ملاقات کرکے کھیل سے متعلق مشورے بھی لے چکے ہیں۔ انہوں نے کہا کہ خدا پر بھروسے اور سخت محنت کے ساتھ آگے بڑھنے والے کھلاڑی کا خواب ضرور پورا ہوتا ہے۔
وِپراج کا انتخاب 11 اکتوبر سے پڈوچیری میں آسٹریلیا ’اے‘ کے خلاف ہونے والی سیریز کے لیے بھی ہوا ہے۔ وہ 28 ستمبر سے ناگویا میں ہندوستانی ٹیم کی نیلی جرسی میں ایشین گیمز کے مقابلوں میں حصہ لیں گے۔