سرینگر؍۲۲ ستمبر
وزیر اسکول ایجوکیشن سکینہ ایتو نے منگل کے روز جموں و کشمیر قانون ساز اسمبلی میں ایک قرارداد پیش کی، جس میں۳۱؍ اکتوبر۲۰۱۹ سے قبل تعینات کیے گئے اساتذہ کو ٹیچر اہلیتی امتحان (ٹی ای ٹی) میں شرکت سے مستثنیٰ قرار دینے کے لیے حقِ تعلیم قانون میں ترمیم کا مطالبہ کیا گیا۔
ایوان میں پیش کی گئی قرارداد میں کہا گیا ہے، ’’یہ ایوان متفقہ طور پر مرکزی حکومت سے درخواست کرتا ہے کہ بچوں کو مفت اور لازمی تعلیم کے حق سے متعلق قانون۲۰۰۹ (آر ٹی ای ایکٹ) کی دفعہ۲۳ میں ضروری قانونی ترمیم کی جائے، تاکہ۳۱؍ اکتوبر۲۰۱۹ سے قبل تعینات تمام اساتذہ کو ٹیچر اہلیتی امتحان (ٹی ای ٹی) میں شرکت سے مستثنیٰ قرار دیا جا سکے۔‘‘
قرارداد میں مزید کہا گیا ہے کہ ایوان مرکزی حکومت سے تمام ضروری قانونی اقدامات اٹھانے اور نیشنل کونسل فار ٹیچر ایجوکیشن (این سی ٹی ای) کے ذریعے ٹی ای ٹی سے استثنیٰ کے لیے مطلوبہ نوٹیفکیشن جاری کرنے کی بھی درخواست کرتا ہے۔
قرارداد پر بحث کے دوران ارکان اسمبلی بلونت سنگھ منکوٹیا، رنبیر سنگھ پٹھانیا، وحید الرحمٰن پرہ اور خورشید احمد شیخ نے حصہ لیا اور اس کے مختلف پہلوؤں پر اپنے خیالات کا اظہار کیا۔
قرارداد پر بحث اسمبلی کے آئندہ کاروباری دن بھی جاری رہے گی۔
۔۔۔۔۔
ایجنسیاں
