بنگلہ دیش کے ساتھ تعلقات کی بہتری کے لیے مطلوب افراد کی حوالگی اہم : مشیر اطلاعات

ڈھاکہ، 15 ستمبر (یو این آئی) بنگلہ دیش کے وزیر اعظم کے امور اطلاعات و نشریات کے مشیر زاہد الرحمن نے منگل کو کہا کہ ہندوستان میں جلاوطنی کی زندگی گزار رہے سابق وزیر اعظم شیخ حسینہ اور سابق وزیر ٹرانسپورٹ عبیدالقدیر سمیت سزا یافتہ افراد اور مطلوب مفروروں کو بنگلہ دیش کے حوالے کرنا دونوں پڑوسی ممالک کے درمیان کشیدہ تعلقات کو معمول پر لانے کے لیے انتہائی اہم ہے۔
میڈیا کے سوالات کے جواب میں ایک پریس بریفنگ کے دوران ڈھاکہ کا موقف واضح کرتے ہوئے مشیر نے کہا کہ یہ معاملہ ہندوستانی ہائی کمشنر دنیش ترویدی کے ساتھ خیرسگالی ملاقات کے دوران بھی نمایاں طور پر اٹھایا گیا تھا۔
زاہد الرحمن نے کہا، ’’ہائی کمشنر کے ساتھ ہماری ملاقات میں ہم نے اپنی جانب سے شیخ حسینہ اور ہندوستان میں موجود تمام دیگر مفرور افراد کو واپس لانے کا معاملہ واضح طور پر اٹھایا۔‘‘ انہوں نے مزید کہا، ’’ہم نے ہندوستانی حکومت سے کہا ہے کہ بنگلہ دیش کے ساتھ عملی تعاون پر مبنی تعلقات کو مضبوط بنانے کے مفاد میں اسے اس معاملے پر سنجیدگی سے غور کرنا چاہیے۔‘‘
یہ پوچھے جانے پر کہ کیا بنگلہ دیشی حکام شیخ حسینہ کے ساتھ ساتھ عبیدالقدیر اور دیگر ملزمان کی حوالگی کا بھی مطالبہ کر رہے ہیں، زاہد نے کہا، ’’اگر ہم شیخ حسینہ کی حوالگی کا مطالبہ کر رہے ہیں تو پھر عبیدالقدیر اور دیگر کا مطالبہ کیوں نہیں کریں گے؟‘‘
انہوں نے کہا، ’’ہندوستانی حکومت سے ہمارا مطالبہ ہے کہ بنگلہ دیش کے ساتھ تعلقات میں بہتری کے لیے یہ ایک انتہائی اہم شرط ہے۔‘‘
قابل ذکر ہے کہ اسی روز بنگلہ دیش کے بین الاقوامی جرائم ٹریبونل (آئی سی ٹی) نے 2024 کی جولائی-اگست کی عوامی تحریک کے دوران مبینہ انسانیت کے خلاف جرائم کے الزام میں کالعدم عوامی لیگ اور اس کی ذیلی نوجوان تنظیموں کے سات رہنماؤں کو سزائے موت سنائی۔ سزا پانے والوں میں عوامی لیگ کے سابق جنرل سیکریٹری عبیدالقدیر بھی شامل ہیں۔
دیگر چھ افراد میں عوامی لیگ کے جوائنٹ جنرل سیکریٹری اے ایف ایم بہاؤالدین نصیم، سابق وزیر مملکت برائے اطلاعات و نشریات محمد علی عرافات، جوبو لیگ کے صدر شیخ فضل شمس پراش، جوبو لیگ کے جنرل سیکریٹری مینول حسین خان نکھل، بنگلہ دیش چھاترا لیگ کے صدر صدام حسین اور چھاترا لیگ کے جنرل سیکریٹری شیخ ولی آصف انان شامل ہیں۔
ڈھاکہ ٹریبیون کے مطابق ساتوں ملزمان مفرور ہیں۔
یہ فیصلہ ملزمان کی غیر موجودگی میں سنایا گیا اور ان مقدمات کی کارروائی مسلسل جانچ پڑتال کی زد میں ہے۔
اس سے قبل نومبر 2025 میں آئی سی ٹی نے جولائی کی عوامی تحریک کے دوران مبینہ انسانیت کے خلاف جرائم کے الزام میں معزول وزیر اعظم شیخ حسینہ کو سزائے موت سنائی تھی۔
ان کے ساتھ سابق وزیر داخلہ اسدالزمان خان کمال کو بھی سزائے موت دی گئی تھی۔ دونوں اس وقت ہندوستان میں جلاوطنی کی زندگی گزار رہے ہیں۔
بنگلہ دیش نے گزشتہ ماہ کہا تھا کہ وزیر اعظم طارق رحمان کا ہندوستان کا دورہ نئی دہلی کی جانب سے عوامی لیگ کی رہنما اور سابق وزیر اعظم شیخ حسینہ کو آئی سی ٹی کی جانب سے سنائی گئی سزا کا سامنا کرنے کے لیے فوری طور پر ڈھاکہ کے حوالے کرنے سے مشروط ہے۔
وزیر اعظم رحمان کا ہندوستان کا دورہ تقریباً حتمی ہو چکا تھا، تاہم حسینہ کی جانب سے 5 اگست کو نئی دہلی میں صحافیوں کے ساتھ آن لائن ملاقات کے بعد ڈھاکہ نے یہ دورہ منسوخ کر دیا۔ یہ آن لائن پروگرام ہندوستان میں ان کی جلاوطنی کے دو سال مکمل ہونے کے موقع پر منعقد کیا گیا تھا۔ ڈھاکہ نے اس تقریب پر شدید برہمی کا اظہار کیا تھا، تاہم ہندوستان کا کہنا ہے کہ اس نجی میڈیا پروگرام سے اس کا کوئی تعلق نہیں تھا۔
حسینہ اور دیگر ملزمان کی جانب سے فیس بک اور مختلف دیگر پلیٹ فارمز پر دیے جانے والے بیانات کے بارے میں زاہد الرحمن نے کہا، ’’وہ بیرون ملک آرام دہ زندگی گزار رہے ہیں۔ وہ سوشل میڈیا پر مختلف بیانات دے رہے ہیں یا مشورے پیش کر رہے ہیں،‘‘ اور ان کے بقول یہ باتیں ’’بنگلہ دیش کے عوام کے جذبات کو شدید مجروح کر رہی ہیں۔‘‘
انہوں نے مقامی میڈیا سے کہا، ’’ہم امید کرتے ہیں کہ ہندوستانی حکومت بنگلہ دیش کے عوام کے ان جذبات اور حساسیت کو سمجھے گی اور انہیں ہمارے حوالے کردے گی۔‘‘