کُلدیپ یادو کی 10 وکٹیں، یارکشائر کی بڑی جیت

ہیڈنگلے، 11 ستمبر (یواین آئی) کُلدیپ یادو کی شاندار اسپن اور جارج ہِل کی عمدہ تیز گیند بازی کے سامنے ایسیکس کی بیٹنگ بری طرح ناکام رہی اور یارکشائر نے ہیڈنگلے میں مقابلہ تین دن میں ختم کرتے ہوئے اننگز اور 106 رن سے بڑی کامیابی حاصل کی۔
اس جیت سے یارکشائر کی ڈویژن ون میں برقرار رہنے کی امیدیں تقریباً یقینی ہوگئی ہیں۔ ڈوم بیس کے ناٹ آؤٹ 80 رن کی بدولت یارکشائر نے پہلی اننگز میں 390 رن بنائے، جس کے جواب میں ایسیکس 171 رن پر آل آؤٹ ہوگئی۔
فالو آن کے بعد دوسری اننگز میں بھی ایسیکس کی حالت نہ سنبھلی اور پوری ٹیم 113 رن پر سمٹ گئی۔ کُلدیپ یادو نے فرسٹ کلاس کرکٹ میں اپنے کیریئر کی بہترین میچ کارکردگی کا مظاہرہ کرتے ہوئے مجموعی طور پر 10 وکٹیں حاصل کیں۔
انہوں نے پہلی اننگز میں چار اور دوسری اننگز میں چھ وکٹیں حاصل کرکے ایسیکس کی واپسی کی تمام امیدیں ختم کردیں۔ جارج ہِل نے دونوں اننگز میں مجموعی طور پر پانچ وکٹیں حاصل کیں۔ تیسرے دن یارکشائر نے ایسیکس کی پہلی اننگز کے باقی تین وکٹ جلد حاصل کرلیے۔ جارج بیل نے 64 رن کی اننگز کھیلی، لیکن ہِل نے زمان اختر اور سیم کک کو آؤٹ کرکے اپنی ٹیم کی گرفت مزید مضبوط کردی، جبکہ کُلدیپ نے مِچ کیلین کو بولڈ کیا۔
فالو آن کے بعد ہِل نے ڈین ایلگر اور ٹام ویسٹلی کو جلد آؤٹ کیا۔ اس کے بعد کُلدیپ نے لگاتار دو گیندوں پر چارلی ایلیسن اور میٹ کرچلی کو آؤٹ کیا۔ انہوں نے بعد میں لُوک بینکنسٹائن، جارج بیل اور زمان اختر کی وکٹیں بھی حاصل کیں۔ ڈوم بیس نے شین سنیٹر اور پال والٹر کو آؤٹ کیا، جبکہ کُل دیپ نے سیم کک کو بولڈ کرکے ایسیکس کی اننگز 113 رن پر سمیٹ دی۔ اس جیت سے یارکشائر کو 22 پوائنٹس ملے اور ٹیم نے 12 میچوں میں اپنی چوتھی کامیابی حاصل کی۔ اس کے دو مقابلے ابھی باقی ہیں۔ اگلے ہفتے یارکشائر اپنے ہوم گراؤنڈ ہیڈنگلے میں خطاب کی دوڑ میں شامل سمرسیٹ کی میزبانی کرے گا۔