تیر اندازی ورلڈ کپ فائنل میں دھیرج بومّادیورا ہندوستان کی واحد امید

سالٹیلو (میکسیکو)، 11 ستمبر (یواین آئی) اولمپین دھیرج بومّادیورا ہفتہ سے یہاں شروع ہونے والے تیر اندازی ورلڈ کپ فائنل 2026 میں ہندوستان کی واحد نمائندگی کریں گے۔
سیزن کے آخری بین الاقوامی تیر اندازی مقابلے میں دنیا کے 32 بہترین تیر انداز شرکت کریں گے، جو مردوں اور خواتین کے انفرادی ریکرو اور کمپاؤنڈ مقابلوں میں ٹائٹل کے لیے مقابلہ کریں گے۔ پویبلا، شنگھائی، انطالیہ اور میڈرڈ میں منعقدہ ورلڈ کپ کے چار مرحلوں کے انفرادی چیمپئنز اور سیزن کی درجہ بندی میں اعلیٰ مقام حاصل کرنے والے تیر اندازوں نے فائنل کے لیے کوالیفائی کیا ہے۔
مردوں اور خواتین کے ریکرو مقابلوں میں کوئی بھی ہندوستانی تیر انداز فائنل کے لیے کوالیفائی نہیں کرسکا، جن میں چار مرتبہ کی اولمپین دیپیکا کماری بھی شامل ہیں۔ خواتین کی کمپاؤنڈ ٹیم بھی سیزن کے اس آخری مقابلے میں جگہ بنانے میں ناکام رہی۔
ہندوستان نے رواں سال ورلڈ کپ کے چار مراحل میں سات تمغے جیتے، جن میں چار طلائی، ایک نقرئی اور دو کانسی کے تمغے شامل ہیں۔ ان میں واحد انفرادی طلائی تمغہ دھیرج بومّادیورا نے جیتا۔ ایشین گیمز 2026 کے لیے ہندوستان کی ریکرو ٹیم میں شامل بومّادیورا نے انطالیہ میں تیسرے مرحلے کے مردوں کے انفرادی ریکرو مقابلے میں طلائی تمغہ جیت کر فائنل کے لیے کوالیفائی کیا۔
بومّادیورا نے ایشین گیمز کی ہندوستانی ٹیم کی رکن کم کم انیل موہود کے ساتھ انطالیہ میں مکسڈ ٹیم کا طلائی تمغہ بھی جیتا تھا۔ انکیتا بھکت، دیپیکا کماری اور کم کم موہود کی خواتین ریکرو ٹیم، جبکہ مدھورا دھامن گاؤںکر، پرگتی اور جیوتی سریکھا وینم کی کمپاؤنڈ خواتین کی تین رکنی ٹیم نے بھی ہندوستان کے لیے طلائی تمغے جیتے۔
مردوں اور خواتین کے انفرادی ریکرو اور کمپاؤنڈ مقابلوں میں آٹھ، آٹھ تیر انداز ورلڈ کپ فائنل کے خطاب کے لیے مقابلہ کریں گے۔