پتنگ بازی کے ساتھ ہندوستانی ٹیم نے افغانستان کے خلاف ٹی-20 سیریز کے لیے مشق کی

نئی دہلی، 11 ستمبر (یواین آئی) افغانستان کے خلاف اتوار سے شروع ہونے والی تین میچوں کی ٹی-20 سیریز سے قبل ہندوستانی کرکٹ ٹیم نے جمعہ کو ارون جیٹلی اسٹیڈیم میں پریکٹس کی۔ اس دوران کھلاڑیوں نے سخت تیاری کے ساتھ ساتھ روایتی پتنگ بازی سے بھی لطف اٹھایا۔ ہندوستانی کرکٹ کنٹرول بورڈ (بی سی سی آئی) نے جمعہ کو پریکٹس سیشن کی جھلکیاں شیئر کیں، جن میں کھلاڑی ٹیم بس سے اسٹیڈیم پہنچتے، نیٹس میں بیٹنگ کرتے اور پریکٹس ڈرلز میں حصہ لیتے نظر آئے۔ ٹیم پہلے ٹی-20 کے لیے اپنی تیاریوں کو حتمی شکل دے رہی تھی۔
پریکٹس کے بعد تربیتی سیشن کی سنجیدگی اس وقت خوش گوار ماحول میں بدل گئی جب اوپنر ابھیشیک شرما اور آل راؤنڈر شیوم دوبے کے درمیان پتنگ بازی کا مقابلہ ہوا۔
بی سی سی آئی نے اس مقابلے کو ’پتنگ بازوں کی ٹکر‘ کا نام دیا۔ اس مقابلے میں ابھیشیک شرما فاتح رہے اور انہوں نے مذاقاً دوبے کے خلاف اپنی جیت کا دعویٰ کیا۔ انہوں نے کہا کہ بچپن میں پتنگ بازی کے تجربے نے انہیں ممبئی کے آل راؤنڈر پر برتری دلائی۔
پریکٹس کے بعد ہونے والے اس منفرد مقابلے سے ہندوستانی ڈریسنگ روم میں کھلاڑیوں کے درمیان باہمی تال میل اور خوش گوار ماحول کی جھلک بھی دیکھنے کو ملی، جبکہ ٹیم ایک چیلنجنگ ٹی-20 سیریز کی تیاری کر رہی ہے۔
تین میچوں کی یہ سیریز مکمل طور پر ارون جیٹلی اسٹیڈیم میں کھیلی جائے گی اور پہلا ٹی-20 اتوار کو ہوگا۔ سیریز میں شریئس ایئر ہندوستانی ٹیم کی کپتانی کریں گے۔