انّ پورنا دیوی بدھ کو وارانسی میں نویں راشٹریہ پوشن ماہ کا کریں گی افتتاح

نئی دہلی، 07 ستمبر (یو این آئی) خواتین و اطفال کی ترقی کی مرکزی وزیرانّ پورنا دیوی بدھ کو اتر پردیش کے وارانسی واقع رودراکش انٹرنیشنل کوآپریشن اینڈ کنونشن سنٹر میں نویں راشٹریہ پوشن ماہ 2026 کا افتتاح کریں گی۔
اس موقع پر اتر پردیش کے وزیراعلیٰ یوگی آدتیہ ناتھ، وزیر مملکت برائے ترقی خواتین و اطفال ساوتری ٹھاکر اور اتر پردیش کی وزیر برائے بہبود خواتین، بچوں کی ترقی و غذائیت بیبی رانی موریہ بھی موجود رہیں گی۔ اس تقریب میں مرکزی حکومت، ریاستوں اور مرکز کے زیر انتظام علاقوں کی معزز شخصیات، ترقیاتی شراکت دار، زمینی سطح کے کارکنان اور مستفیدین شامل ہوں گے۔ سرکاری معلومات کے مطابق سال 2047 تک غذائیت سے بھرپور ہندوستان کو ترقی یافتہ ہندوستان کی بنیاد بنانے کے وزیراعظم نریندر مودی کے ویژن سے متاثر ہو کر، 2018 میں ‘پوشن ابھیان’ شروع کیا گیا تھا تاکہ غذائیت کو قومی ترقی کے ایجنڈے کے مرکز میں رکھا جا سکے۔ ہر سال ستمبر میں منایا جانے والاراشٹریہ پوشن ماہ تبھی سے ایک عوامی تحریک بن چکا ہے، جو برادریوں کو خواتین، بچوں اور نوجوانوں میں غذائیت، صحت اور دیکھ بھال سے متعلق رویوں کو مضبوط کرنے کے لیے متحرک کرتا ہے۔
اس مہم کا نواں ایڈیشن ‘ہماری آنگن واڑی ہماری ذمہ داری’ تھیم کے تحت غذائیت کے اس سفر کو آگے بڑھاتا ہے، جس میں ہر شہری سے آنگن واڑی مرکز کی مشترکہ ذمہ داری لینے کی اپیل کی گئی ہے، جو ملک کے بچوں کے لیے غذائیت، صحت، دیکھ بھال اور ابتدائی تعلیم کا پہلا مرکز ہے۔ اس سال کی مہم مشن سکشم آنگن واڑی اور پوشن 2.0 کے تحت ترمیم شدہ سپلیمنٹری نیوٹریشن پروگرام (ایس این پی) کی رہنما ہدایات سے رفتار حاصل کرے گی۔