جموں/۷ستمبر
ایک پاکستانی شہری، جسے حال ہی میں غلطی سے سرحد پار کرکے اس طرف داخل ہونے کے بعد حراست میں لیا گیا تھا، پیر کے روز جموں میں بین الاقوامی سرحد کے راستے پاکستانی رینجرز کے حوالے کردیا گیا۔ حکام نے یہ اطلاع دی۔
حکام کے مطابق سیالکوٹ کے لونی پُندرا گاؤں کے رہائشی نذیر صادِر کو بارڈر سیکیورٹی فورس (بی ایس ایف) نے گول پٹن بارڈر آؤٹ پوسٹ کے علاقے میں پاکستانی رینجرز کے حوالے کیا۔
اسے۳ ستمبر کو جموں کے کانہ چک علاقے میں حراست میں لیا گیا تھا، جہاں وہ سرحد پار سے بھارتی حدود میں داخل ہوگیا تھا۔
حکام نے بتایا کہ بعد میں درانداز سے پوچھ گچھ کے دوران معلوم ہوا کہ وہ پاکستان کے ایک سرحدی گاؤں کا رہائشی ہے اور غلطی سے بھارتی حدود میں داخل ہوگیا تھا۔
حکام نے مزید بتایا کہ اس کے بعد بی ایس ایف کے اہلکاروں نے پاکستانی حکام سے رابطہ قائم کیا اور پاکستان رینجرز کے ساتھ فلیگ میٹنگ کی، جس کے بعد مذکورہ شخص کو ان کے حوالے کردیا گیا۔
۔۔۔۔۔۔۔۔۔۔۔(ایجنسیاں )
