دورۂ سری لنکا کے لیے پاکستان کی خاتون ٹیم کا اعلان، فاطمہ ثناء ون ڈے اور منیبہ علی ٹی ٹوئنٹی ٹیم کی قیادت کریں گی

لاہور، 18 جولائی (یو این آئی): پاکستان کرکٹ بورڈ نے سری لنکا دورے کے لیے خاتون ٹیم کے ون ڈے اور ٹی ٹوئنٹی اسکواڈ کا اعلان کر دیا ہے۔ دونوں فارمیٹس کے لیے 15، 15 کھلاڑیوں پر مشتمل اسکواڈز منتخب کیے گئے ہیں۔
فاطمہ ثناء ون ڈے سیریز میں پاکستانی ٹیم کی قیادت کریں گی، جبکہ ان کی عدم دستیابی میں ٹی ٹوئنٹی سیریز کے لیے منیبہ علی کپتان ہوں گی۔ فاطمہ ثناء ون ڈے سیریز کے اختتام کے بعد انگلینڈ میں دی ہنڈرڈ ٹورنامنٹ میں شرکت کے لیے روانہ ہوں گی۔
پاکستان کرکٹ بورڈ کے مطابق آئی سی سی ویمنز ٹی ٹوئنٹی ورلڈ کپ میں حصہ لینے والی ٹیم کے مقابلے میں ٹی ٹوئنٹی اسکواڈ میں آٹھ تبدیلیاں کی گئی ہیں۔ ایمان نصیر، حمنہ بلال، ماہم انیس، مومنہ ریاست، نجیہہ علوی، شوال ذوالفقار، ام ہانی اور وحیدہ اختر کو ٹیم میں شامل کیا گیا ہے۔
ایمان نصیر، ماہم انیس اور مومنہ ریاست ٹی ٹوئنٹی انٹرنیشنل میں پہلی بار پاکستان کی نمائندگی کریں گی۔
آئی سی سی ویمنز چیمپئن شپ کا حصہ ون ڈے میچز 23، 25 اور 28 جولائی کو کھیلے جائیں گے۔ اسکواڈ میں شامل ماہم انیس اور سائرہ جبین ابھی تک ون ڈے انٹرنیشنل میں ڈیبیو نہیں کر سکی ہیں۔
ون ڈے اسکواڈ میں فاطمہ ثناء (کپتان)، عائشہ ظفر، گل فیروزہ، ماہم انیس، مومنہ ریاست، منیبہ علی، نجیہہ علوی، نشرہ سندھو، صدف شمس، سائرہ جبین، سدرا امین، سیدہ عروب شاہ، تسمیہ رباب، ام ہانی اور وحیدہ اختر شامل ہیں۔
ٹی ٹوئنٹی اسکواڈ میں منیبہ علی (کپتان)، عائشہ ظفر، ایمان نصیر، ایمان فاطمہ، حمنہ بلال، ماہم انیس، مومنہ ریاست، نجیہہ علوی، نشرہ سندھو، سائرہ جبین، شوال ذوالفقار، تسمیہ رباب، طوبیٰ حسن، ام ہانی اور وحیدہ اختر کو شامل کیا گیا ہے۔
پاکستان اور سری لنکا کی ویمن ٹیموں کے درمیان ون ڈے اور ٹی ٹوئنٹی سیریز 23 جولائی سے 4 اگست تک کھیلی جائے گی۔