بھاگوت کا نیویارک پروگرام ہندستانی اقدار کی عکاسی ہے: آر ایس ایس

نئی دہلی، 27 اگست (یواین آئی) راشٹریہ سویم سیوک سنگھ (آر ایس ایس) نے سنگھ کے سربراہ موہن بھاگوت کے امریکہ کے شہر نیویارک میں منعقد ہونے والے پروگرام کو اپنی پرانی روایت کا حصہ قرار دیتے ہوئے اس کے وژن اور نظریے کو جاننے کے خواہشمند افراد کو اس میں شرکت کی دعوت دی ہے۔
آر ایس ایس کے اکھل بھارتیہ پرچار پرمکھ سنیل آمبیکر نے سوشل میڈیا پلیٹ فارم ‘ایکس’ پر ایک پوسٹ میں لکھا ہے کہ نیویارک میں منعقد ہونے والا ‘یونیورسل وننیس سیلیبریشن’ مختلف مذاہب کے لوگوں کے ملن کی ایک مثال ہے، جہاں آر ایس ایس کے سرسنگھ چالک ڈاکٹر موہن بھاگوت مختلف ثقافتوں اور مذاہب کے لوگوں سے بات چیت کریں گے۔ انہوں نے کہا کہ کھلی بات چیت اور باہمی احترام کے جذبے سے منعقدہ یہ پروگرام ہندستانی اقدار کی عکاسی کرتا ہے، جو بنیادی طور پر سب کو ساتھ لے کر چلنے اور سب کا استقبال کرنے پر مبنی ہیں۔
انہوں نے مزید کہا، "یہ پہل آر ایس ایس کی اس پرانی روایت کا حصہ ہے جس کے تحت وہ ہندستان اور دنیا بھر کی مختلف برادریوں کے ساتھ جڑ کر باہمی تفہیم اور مشترکہ مقاصد کو فروغ دیتا رہا ہے۔” انہوں نے کہا، "ہم ان تمام لوگوں کو بات چیت کے اس کھلے منچ میں شامل ہونے کی دعوت دیتے ہیں جو آر ایس ایس کے وژن اور نظریے کے بارے میں مزید جاننا چاہتے ہیں۔”
قابلِ ذکر ہے کہ مسٹر بھاگوت کا نیویارک کے میڈیسن اسکوائر میں 29 اگست کو ‘یونیورسل وننیس سیلیبریشن’ کے نام سے ایک پروگرام منعقد ہونے والا ہے۔ اس پروگرام کے حوالے سے نیویارک کے میئر زہران ممدانی نے منگل کے روز صحافیوں سے گفتگو کرتے ہوئے کہا تھا، "میں اس پروگرام کی حمایت نہیں کرتا، لیکن اس پروگرام کو منسوخ کرنے کا اختیار میرے پاس نہیں ہے۔