ہمارے اہداف خیالی نہیں بلکہ حقیقت پسندانہ ہیں :بخاری

سرینگر//
اپنی پارٹی کے صدر‘ سید محمد الطاف بخاری نے کہا ہے کہ پارٹی کے عوامی جلسوں میں بھاری عوامی شرکت سے عندیہ ملتا ہے کہ لوگ اب روایتی سیاسی جماعتوں کی ’مکارانہ‘ پالیسیوں سے اکتا گئے ہیں اور وہ حقیقت پسندانہ سیاست کا ساتھ دینا چاہتے ہیں۔
بخاری پیر کو کھنہ بل ڈاک بنگلہ میں پارٹی کنونشن سے خطاب کررہے تھے۔
ایک بیان کے مطابق بخاری نے کہا کہ اپنی پارٹی عوام کو مایوس نہیں کریگی کیونکہ روایتی سیاسی جماعتوں کے برعکس اپنی پارٹی نے عوام کے بہتر مستقبل کیلئے حقیقت پسندانہ اہداف مقرر کئے ہیں۔انہوں نے کہا’’ ہم آپ کو مایوس نہیں کریں گے کیونکہ ہمارے اہداف خیالی نہیں بلکہ حقیقت پسندانہ اور قابلِ حصول ہیں۔ ہم یہاں دائمی امن کے قیام کے متمنی ہیں تاکہ اس کے نتیجے میں لوگوں کو ایک ایسا ماحول میسر ہوجائے ، جس سے وہ سیاسی اور معاشی لحاظ سے با اختیار ہوں۔ ایک پر امن ماحول ہی ہمیں وہ سب کچھ فراہم کراسکتا ہے،جو عوام کیلئے اہم ہے‘‘۔
اپنی پارٹی کے صدر نے مزید کہا’’سب سے اہم بات یہ ہے کہ ایک پر امن ماحول کے نتیجے میں عوام بالخصوص ہمارے نوجوانوں کے محفوظ اور بہتر مستقبل کی ضمانت ہے‘‘۔
روایتی سیاسی جماعتوں کی ’پر فریب ‘سیاست کو لتاڑتے ہوئے بخاری نے کہا’’روایتی سیاسی جماعتوں کی مکارانہ پالیسیوں اور جھوٹی سیاست نے عوام کو ان تک بھاری نقصانات سے دوچار کردیا ہے۔ ان روایتی سیاسی جماعتوں اور ان کے لیڈروں نے ہمیشہ یہاں کے لوگوں کو ناقابلِ حصول اہداف اور جذباتی نعروں کے پیچھے لگادیا تاکہ وہ خود اقتدار میں رہیں۔ ان کی غیر حقیقت پسندانہ سیاست اور ناقابل حصول اہداف نے لوگوں پر مصیبتوں کے پہاڑ نازل کردیئے ہیں اور لاکھوں نوجوانوں کو یا تو جیلوں یا پھر قبرستانوں میں پہنچا دیا‘‘۔
بخاری نے ’’ان میں سے کچھ جماعتوں اور لیڈروں نے آپ کو اٹانومی دلانے کا وعدہ کیا تھا اور کچھ نے سیلف رول دلانے کا۔ بعض نے رائے شماری کی یقین دہانی کرائی تھی اور بعض نے آزادی دلانے کی۔ کیا ان میں سے کوئی وعدہ پورا ہوا؟ حقیقت یہ ہے کہ اس طرح کے وعدے کرنے والے محض عوام کو گمراہ کررہے تھے تاکہ وہ خود اقتدار کے مزے لوٹتے رہیں‘‘۔
اپنی پارٹی کے صدر نے یہ بات دہرائی کہ اپنی پارٹی جموں کشمیر کے عوام کے سیاسی اور معاشی حقوق کیلئے جدوجہد جاری رکھے گی۔ انہوں نے کہا’’ہم عوام کے سیاسی اور معاشی حقوق بحال کرانے کیلئے کوئی دقیقہ فروگزاشت نہیں کریں گے۔ ہم سٹیٹ سبجیکٹ قوانین کو واپس لائیں گے اور جموں کشمیر میں تاریخی دربار مو کو بحال کریں گے‘‘۔
بخاری نے عوام کو تلقین کی کہ وہ منشیات کی وبا کے خلاف ’جہاد‘ شروع کریں۔ انہوں نے کہا’’ہم سب کو اس وبا کے خلاف جہاد کرنا ہوگا۔ ہم اپنے نوجوانوں کو اس طرح سے تباہ ہوتے ہوئے نہیں دیکھ سکتے ہیں۔‘‘