نمن تیواری کے چھ وکٹوں کی بدولت نوئیڈا کنگز نے گورکھپور لائنز کو شکست دے دی

لکھنؤ، 24 اگست (یواین آئی) تیز گیند باز نمن تیواری کی شاندار گیند بازی (13 رنز دے کر چھ وکٹیں) اور بعد میں بلے بازوں کی پُراعتماد کارکردگی کی بدولت نوئیڈا کنگز نے یوپی ٹی-20 لیگ سیزن-4 کے پیر کو کھیلے گئے بارش سے متاثرہ دوسرے مقابلے میں گور گورکھپور لائنز کو چار وکٹوں سے شکست دے دی۔
اکانا اسٹیڈیم میں بارش اور آؤٹ فیلڈ گیلی ہونے کی وجہ سے میچ کو 18،18 اوورز تک محدود کردیا گیا تھا۔ گور گورکھپور لائنز نے پہلے بلے بازی کرتے ہوئے 17.5 اوورز میں 112 رنز پر پوری ٹیم گنوا دی۔ جواب میں نوئیڈا کنگز نے 16.1 اوورز میں چھ وکٹوں کے نقصان پر 113 رنز بنا کر کامیابی حاصل کرلی۔
میچ کے ہیرو نمن تیواری رہے، جنہوں نے 3.5 اوورز میں محض 13 رنز دے کر چھ وکٹیں حاصل کیں۔ اس شاندار کارکردگی کے ساتھ وہ یوپی ٹی-20 لیگ میں ایک اننگز میں بہترین گیند بازی کا مظاہرہ کرنے والے گیند باز بن گئے۔
گورکھپور لائنز کی شروعات انتہائی خراب رہی۔ دوسرے اوور میں نمن تیواری نے سلامی بلے باز ابھے پرتاپ سنگھ (10) کو بولڈ کرکے پہلا جھٹکا دیا۔ اس کے بعد چوتھے اوور میں انہوں نے کپتان آریان جویال (2) کو آؤٹ کرکے گورکھپور کی مشکلات بڑھا دیں۔ ٹیم ابتدائی جھٹکوں سے سنبھل بھی نہیں پائی تھی کہ ساتویں اوور میں ونش نے آریان چودھری (15) اور پرنس یادو (10) کو آؤٹ کردیا۔
اس کے بعد 13ویں اوور میں نمن نے شیوم شرما (3) کو وکٹ کیپر آدتیہ شرما کے ہاتھوں کیچ کرایا اور اسی اوور میں سدھارتھ یادو (18) کو کپتان پرشانت ویر کے ہاتھوں کیچ کراکر پویلین بھیج دیا۔ نچلے نمبر کے بلے باز پرتھ پہلاوت (14) اور انکیت چودھری (14) نے کچھ دیر مزاحمت کی، لیکن ٹیم بڑا اسکور بنانے میں کامیاب نہیں ہوسکی۔
113 رنز کے ہدف کا تعاقب کرنے اتری نوئیڈا کنگز کی شروعات بھی اچھی نہیں رہی۔ دوسرے اوور میں مادھو کوشک (8) وشال کمار کی گیند پر واسو وتس کو کیچ دے بیٹھے۔ پانچویں اوور میں شعیب صدیقی (13) بھی واسو وتس کا شکار بنے۔ ٹیم نے 35 رنز کے اسکور تک اپنے دو وکٹیں گنوا دی تھیں۔
اس کے بعد روی سنگھ (19) کو وشال نشاد نے آؤٹ کیا، جبکہ انویش چودھری (13) شیوم شرما کی گیند پر سدھارتھ یادو کو کیچ دے بیٹھے۔ آدتیہ شرما نے 35 رنز کی مفید اننگز کھیلی، لیکن وہ بھی شیوم شرما کا شکار ہوگئے۔ اننگز کے 16ویں اوور میں کارتک سدھو (2) کو واسو وتس نے آؤٹ کردیا۔
نوئیڈا کنگز کو ایک موقع پر جیت کے لیے 13 گیندوں پر صرف چھ رنز درکار تھے۔ اس کے بعد کپتان پرشانت ویر نے 17ویں اوور کی پہلی ہی گیند پر زوردار چھکا لگا کر ٹیم کو فتح دلا دی۔ پرشانت نے 10 گیندوں پر دو چھکوں کی مدد سے ناٹ آؤٹ 20 رنز بنائے۔