بنگلہ دیش کو تنزید اور مشفق الرحیم کی فٹنس کلیئرنس کا انتظار

مکائے، 21 اگست (یو این آئی) بنگلہ دیش کو امید ہے کہ فارم میں موجود سلامی بلے باز تنزید حسن تمیم ہفتہ سے شروع ہونے والے مکائے ٹیسٹ کے لیے دستیاب ہوں گے، تاہم ٹیم طبی کلیئرنس کا انتظار کررہی ہے۔
ٹیسٹ کپتان نجم الحسن نے جمعہ کو کہا کہ انہیں امید ہے کہ مشفق الرحیم اور تنزید دونوں ٹیسٹ کھیلنے کے لیے فٹ ہوں گے۔ مشفق کو جمعرات کی ٹریننگ کے دوران انگلی میں چوٹ لگی تھی، جبکہ گردن میں اکڑن کے باعث تنزید نے اس روز بیٹنگ پریکٹس نہیں کی تھی۔
اسکین کے بعد تنزید جمعہ کو ٹریننگ میں واپس آئے اور نیٹس میں بیٹنگ بھی کی، تاہم ٹیم انتظامیہ ان کی فٹنس رپورٹ کا انتظار کررہی ہے۔ ڈارون میں پہلے ٹیسٹ میں تنزید نے اپنی پہلی ٹیسٹ سنچری بنائی تھی۔
متبادل منصوبے کے تحت سومیا سرکار نے مسلسل دوسرے دن طویل بیٹنگ سیشن کیا۔ اگر تنزید آخری وقت میں دستیاب نہ ہوئے تو انہیں ٹیم میں شامل کیا جاسکتا ہے۔
نجم الحسن نے کہا کہ مشفق اب تک ٹھیک ہیں اور تنزید نے بھی بیٹنگ کی ہے۔ ان کے مطابق آخری فیصلہ ہفتہ کی صبح کیا جائے گا اور ٹیم کے پاس تمام متبادل موجود ہیں۔
ٹیم انتظامیہ کو یہ فیصلہ بھی کرنا ہے کہ تجربہ کار بائیں ہاتھ کے اسپنر تیجُل اسلام کی جگہ چار تیز گیندبازوں کے ساتھ میدان میں اترا جائے یا ڈارون ٹیسٹ میں کھیلنے والے فاسٹ بولرز میں سے کسی ایک کی جگہ شریف الاسلام کو موقع دیا جائے۔
شریف الاسلام انجری کے باعث پہلا ٹیسٹ نہیں کھیل سکے تھے، لیکن اب ٹیم میں شامل ہوچکے ہیں اور نیٹس میں اچھی گیندبازی کررہے ہیں۔ نجم کے مطابق مکائے میں تیز ہوا گیند کو سوئنگ کرانے میں مدد دے سکتی ہے۔
نجم نے کہا کہ پچ اچھی دکھائی دے رہی ہے اور ٹیم کے پانچوں تیز گیندباز تیار ہیں۔ ان کے مطابق دونوں اسپنرز بھی مختلف حالات میں مؤثر ثابت ہوسکتے ہیں، اس لیے ٹیم مینجمنٹ ہفتہ کی صبح پچ کا دوبارہ جائزہ لے کر بہترین امتزاج کا فیصلہ کرے گی۔
نجم الحسن نے کہا کہ ڈارون کی تاریخی فتح اب ماضی کا حصہ ہے اور ٹیم کو اگلے ٹیسٹ پر توجہ مرکوز کرنی ہوگی۔ انہوں نے کہا کہ آسٹریلیا کے خلاف دوبارہ اچھی کرکٹ کھیلنا ضروری ہے اور ڈارون کی جیت نے یہ مثبت پیغام ضرور دیا ہے کہ بنگلہ دیش کسی بھی حالات میں بہتر کارکردگی دکھانے کی صلاحیت رکھتا ہے۔