جموں/ ۲۰ ؍اگست
بھارتی ریلوے ادھم پور کے راستے جموں اور سری نگر کے درمیان تیسری وندے بھارت ٹرین شروع کرنے جا رہی ہے۔ نئی سروس مسافروں کو سفر کا ایک اور متبادل فراہم کرے گی اور جموں و کشمیر کے دونوں شہروں کے درمیان ٹرینوں کی گنجائش میں اضافہ کرے گی۔
اس وقت جموں اور سری نگر کے درمیان دو وندے بھارت ٹرینیں چار سروسز کے ساتھ چل رہی ہیں۔ وادیٔ کشمیر کے لیے دونوں وندے بھارت ٹرینیں ۶ جون ۲۰۲۵ کو متعارف کرائی گئی تھیں اور ابتدا میں یہ ٹرینیں شری ماتا ویشنو دیوی کٹرا اور سری نگر کے درمیان چلائی جاتی تھیں۔
۳۰ ؍اپریل ۲۰۲۶ سے ان خدمات کو جموں توی ریلوے اسٹیشن تک توسیع دے دی گئی، جس کے بعد مسافروں کو جموں اور سری نگر کے درمیان براہِ راست وندے بھارت ریل رابطہ حاصل ہوگیا۔
ریلوے کے مطابق دونوں وندے بھارت ٹرینیں آغاز کے بعد سے مکمل مسافروں کے ساتھ چل رہی ہیں۔ مسافروں کی زیادہ مانگ کو مدنظر رکھتے ہوئے ریلوے نے ہر ٹرین میں کوچوں کی تعداد ۱۶ سے بڑھا کر ۲۰ کر دی ہے۔
مرکزی وزیر ڈاکٹر جتیندر سنگھ نے ایکس پر ایک پوسٹ شیئر کی، جس میں ریلوے کے وزیر اشونی ویشنو کا خط بھی شامل تھا۔ خط میں ویشنو نے کہا کہ شہید کیپٹن تشار مہاجن ادھم پور کے راستے جموں توی اور سری نگر کے درمیان تیسری وندے بھارت ایکسپریس چلانے کی منظوری دے دی گئی ہے۔
نئی سروس ٹرین نمبر۲۶۴۰۷/۲۶۴۰۸جموں توی-سری نگر-جموں توی وندے بھارت ایکسپریس کے طور پر چلائی جائے گی۔
فی الحال جموں توی اور سری نگر کے درمیان چلنے والی وندے بھارت ایکسپریس کے راستے میں چار اسٹیشنوں پر قیام ہوتا ہے۔ ان میں شہید کیپٹن تشار مہاجن ادھم پور، شری ماتا ویشنو دیوی کٹرا، ریاسی اور بانہال شامل ہیں۔
وندے بھارت ایکسپریس ۲۶۹ کلومیٹر کا فاصلہ ۴ گھنٹے ۴۵ منٹ میں طے کرتی ہے۔
۔۔۔۔۔۔۔
