اسرائیل سے ہجرت کی ’سونامی‘ ملک کے مستقبل کو نئی شکل دے رہی ہے: ماہرین کا انتباہ

تل ابیب، 20 اگست (یو این آئی) اہم انتخابات سے قبل اسرائیل سے بیرونِ ملک جانے والے افراد کی تعداد میں مسلسل اضافہ ہو رہا ہے، جس سے گزشتہ کئی دہائیوں سے ملک میں برقرار رہنے والا رجحان تبدیل ہو رہا ہے۔
اسرائیلی ٹیکس اتھارٹی کی جانب سے رواں ماہ کے آغاز میں جاری کی گئی ایک تحقیق نے ایسی متعدد رپورٹس کی مزید تصدیق کی ہے جن کے مطابق جیسے جیسے اسرائیلی حکومت زیادہ سخت گیر اور دائیں بازو کی جانب بڑھ رہی ہے، ویسے ویسے زیادہ تعلیم یافتہ اور دولت مند اسرائیلی اس ملک سے باہر جا رہے ہیں جس کے بارے میں ان میں سے بہت سے لوگوں کا کہنا ہے کہ وہ اب اسے پہلے جیسا نہیں سمجھتے۔
تحقیق کے مطابق 2023 اور 2024 میں اسرائیل سے ہجرت نہ صرف گزشتہ برسوں کے مقابلے میں زیادہ رہی بلکہ ملک چھوڑنے والوں میں زیادہ آمدنی والے طبقات سے تعلق رکھنے والے افراد کا تناسب بھی زیادہ تھا۔ بہت سے اسرائیلی جو خود کو لبرل سمجھتے ہیں، ان کا خیال ہے کہ وزیر اعظم بینجمن نیتن یاہو کی حکومت نے ملک کو کم سیکولر بنا دیا ہے اور اس کے اداروں، بالخصوص عدلیہ کی خودمختاری کو کمزور کیا ہے۔
2023 میں عدالتی نگرانی کو کمزور کرنے کی حکومت کی کوششوں کے خلاف دسیوں ہزار اسرائیلی سڑکوں پر نکل آئے تھے۔ مظاہرین کا خیال تھا کہ حکومت ملک کی بنیادی نوعیت کو تبدیل کرنے کی کوشش کر رہی ہے۔ اسرائیل کے تعلیم یافتہ طبقے میں حکومت کی پالیسیوں پر تحفظات 7 اکتوبر 2023 کے حماس کی قیادت میں ہونے والے حملے اور اس کے بعد اسرائیلی ردعمل سے مزید گہرے ہوئے۔
اسرائیل نے غزہ میں جنگ اور خطے کے مختلف محاذوں پر فوجی کارروائیاں شروع کیں، جن کے نتیجے میں 73 ہزار سے زائد فلسطینی ہلاک ہو چکے ہیں۔ اگرچہ بہت سے اسرائیلی اصولی طور پر ان جنگوں کے مخالف نہیں، لیکن ان کی غیر معینہ مدت تک جاری رہنے اور حکومت کی جانب سے جن کامیابیوں کے دعوے کیے گئے تھے انہیں مکمل طور پر حاصل نہ کر پانے کی صورت حال نے بہت سے لوگوں کو مسلسل جنگ کے ایک نہ ختم ہونے والے چکر میں پھنسا ہوا محسوس کرایا ہے۔
تل ابیب یونیورسٹی کے اگست میں کیے گئے ایک سروے نے بھی یہ ظاہر کیا کہ اسرائیل سے ہجرت کا حجم بڑھ رہا ہے اور ملک چھوڑنے والوں کی بڑی تعداد زیادہ تعلیم یافتہ اور خوشحال طبقے سے تعلق رکھتی ہے۔ یونیورسٹی کی تحقیق، جس میں اسرائیل کے مرکزی ادارۂ شماریات کے اعداد و شمار استعمال کیے گئے، کے مطابق گزشتہ تین برس کے دوران تقریباً 2 لاکھ 70 ہزار اسرائیلی ملک چھوڑ چکے ہیں۔ 2023 میں 86,500 سے زیادہ اسرائیلی بیرونِ ملک گئے، جبکہ 2024 میں یہ تعداد تقریباً 91,500 رہی اور 2025 میں بھی یہ تعداد تقریباً اتنی ہی رہی۔
اسرائیلی اپوزیشن کے رکن گیلاد کاریو، جو اسرائیلی پارلیمنٹ کی امیگریشن، انضمام اور ڈائسپورا امور کی کمیٹی کے چیئرمین ہیں، نے خبردار کیا کہ اسرائیل کو ہجرت کی ایک ’’سونامی‘‘ کا سامنا ہے، جبکہ ان کے بقول حکومت اس مسئلے سے نمٹنے کے لیے کچھ نہیں کر رہی۔ بدنامی کا احساس تجزیہ کاروں اور مبصرین نے اکثر اسرائیل چھوڑنے والوں کے ساتھ وابستہ بدنامی کے احساس کی نشاندہی کی ہے، کیونکہ بہت سے اسرائیلی، خصوصاً دائیں بازو کی جانب جھکاؤ رکھنے والے افراد، یہ سمجھتے ہیں کہ دنیا بھر کے یہودیوں کے لیے اسرائیل آنا ایک فطری خواہش ہونی چاہیے۔
1970 کی دہائی میں اس وقت کے وزیر اعظم اسحاق رابین نے اسرائیل چھوڑنے والے اسرائیلیوں کو ’’کمزور لوگوں کا سیلاب‘‘ قرار دیا تھا۔ بعد میں اسرائیلی سیاست کے مختلف حلقوں نے بھی یہ اصطلاح استعمال کی۔ ہجرت سے متعلق زبان بھی واضح طور پر قدر و قیمت کا فیصلہ ظاہر کرتی ہے۔ اسرائیل کی طرف یہودیوں کی ہجرت کے لیے عبرانی اصطلاح عالیہ (Aliyah) استعمال ہوتی ہے، جس کے معنی ’’بلندی کی طرف چڑھنا‘‘ ہیں، جبکہ بیرونِ ملک جانے والے اسرائیلیوں کو روایتی طور پر یوردیم (Yordim) کہا جاتا ہے، یعنی ’’نیچے اترنے والے‘‘۔
اسرائیل میں ماضی میں بھی ہجرت کا توازن منفی ہوا ہے، لیکن یہ صورتحال عموماً مختصر عرصے تک رہی اور اکثر قلیل مدتی مالی بحرانوں کے ردعمل میں سامنے آئی۔ اسرائیلی ماہر آبادیات اور شماریات دان رجیو ڈیلا پرگولا سزنے کہا کہ آئرلینڈ اور نیوزی لینڈ جیسے ممالک میں بھی بعض اوقات بیرونِ ملک جانے والوں کی تعداد ملک میں آنے والوں سے زیادہ رہی ہے، لیکن اسرائیل میں طویل عرصے تک اتنی بڑی تعداد میں لوگوں کا ملک چھوڑنا تشویش ناک ہے۔
انہوں نے الجزیرہ سے کہا، ’’اس بار یہ واضح نہیں کہ معیشت کا اس میں کیا کردار ہے۔ کچھ لوگ انفرادی طور پر بہتر ملازمت یا کیریئر کے مواقع کے لیے جا رہے ہوں گے، لیکن مجموعی طور پر ہم ایسے لوگوں کو ملک چھوڑتے دیکھ رہے ہیں جو اپنی سلامتی کے بارے میں مستقل غیر یقینی اور ملک کی سیاسی سمت پر خدشات محسوس کرتے ہیں۔‘‘ ڈیلا پرگولا کے مطابق اسرائیل میں ’’انتہا پسند‘‘ سمجھی جانے والی شخصیات کی اہمیت نے سیاسی تقسیم کو مزید گہرا کیا ہے۔ جاری ۔ یو این آئی۔ ع ا۔
رجیو ڈیلا پرگولا سز نے قومی سلامتی کے وزیر ایتامار بن گویر کی مثال دی، جنہوں نے حال ہی میں غزہ میں ہر رات 30 سے 40 فلسطینیوں کو ہلاک کرنے کا مطالبہ کیا تھا۔ تاہم ان کا کہنا تھا کہ ایسی شخصیات بالآخر نیتن یاہو کی سیاسی حکمت عملی کے تحت کام کرنے والے عناصر ہیں، نہ کہ آزادانہ طور پر کام کرنے والی قوتیں۔ انہوں نے کہا، ’’غلطی نہ کریں، یہ سب نیتن یاہو کے زیرِ قیادت ایک آرکسٹرا کے کھلاڑی ہیں۔‘‘